Нацбанк: Попыт на крэдыты з боку насельніцтва захоўваецца на высокім узроўні
У 2017 годзе завінавачанасць насельніцтва па спажывецкіх крэдытах вырасла на 75% да 3 млрд рублёў, у 2018 годзе — на 45,7% да 4,39 млрд.
Попыт на крэдыты з боку насельніцтва захоўваецца на высокім узроўні, паведаміў начальнік галоўнага ўпраўлення манетарнай палітыкі і эканамічнага аналізу Нацыянальнага банка Дзмітрый Мурын у дакладзе на пашыраным пасяджэнні праўлення рэгулятара.
Пры павелічэнні сярэдняй працэнтнай стаўкі па новых крэдытах банкаў у нацыянальнай валюце (без уліку крэдытаў, пададзеных на льготных умовах) для фізічных асоб з 9,9% гадавых у снежні 2018 года да 10,5% гадавых у верасні 2019 года гадавы прырост рублёвых крэдытаў банкаў фізічным асобам на 1 кастрычніка 2019 года склаў 22,8%.
Як адзначыў Мурын, найбольшае павелічэнне адзначаецца па спажывецкім крэдытаванні — 30,8%, што абумовіла рост яго долі ў рублёвым партфелі банкаў. Калі на 1 студзеня 2018 года яна складала 15,8%, то на 1 студзеня і 1 кастрычніка 2019 года — 19,3 і 21% адпаведна.
„Разам з тым прынятыя меры ў галіне абмежавання межавай пазыковай нагрузкі на крэдытаатрымальніка таксама даюць вынікі. Яшчэ ў канцы мінулага года тэмп прыросту спажывецкіх крэдытаў складаў 45,7%”, — канстатаваў начальнік галоўнага ўпраўлення манетарнай палітыкі і эканамічнага аналізу.
Паводле дадзеных Нацбанка, у студзені—жніўні 2019 года запазычанасць фізічных асоб па спажывецкіх крэдытах павялічылася на 16,8% (738,1 млн рублёў) і склала 5 млрд 123,4 млн рублёў.
У апошнія гады ў Беларусі назіраліся высокія тэмпы спажывецкага крэдытавання. У 2017 годзе завінавачанасць насельніцтва па спажывецкіх крэдытах вырасла на 75% да 3 млрд рублёў, у 2018 годзе — на 45,7% да 4,39 млрд.
Летась Нацыянальны банк увёў паказчык пазыковай нагрузкі, згодна з якім банкі павінны абмяжоўваць выдачу крэдытаў фізічным асобам, чые штомесячныя фінансавыя абавязацельствы перавышаюць 40% сярэднямесячнага даходу.
У красавіку 2019 года Нацбанк давёў да банкаў дадатковыя патрабаванні, якія яны павінны выконваць на этапе разгляду заявак кліентаў аб атрыманні спажывецкіх крэдытаў. У прыватнасці, банкі павінны разлічваць паказчык пазыковай нагрузкі з улікам завінавачанасці насельніцтва, якая сфарміравалася ў грамадзян у сувязі з пакупкай тавараў з дапамогай карт растэрміновак.
У Нацбанку таксама заяўлялі аб магчымым узмацненні жорсткасці патрабаванняў да велічыні пазыковай нагрузкі фізічных асоб у выпадку паскарэння тэмпаў крэдытавання насельніцтва. „Паводле звестак крэдытнага рэгістра, працягваецца рост колькасці фізічных асоб, якія маюць хаця б адзін спажывецкі крэдыт, і колькасці спажывецкіх крэдытаў на аднаго пазычальніка. І хоць на бягучы момант змена інструментаў пазыковай нагрузкі не плануецца, у выпадку паскарэння тэмпаў крэдытавання ў дадзеным сегменце магчымае ўзмацненне жорсткасці параметраў абмежавання пазыковай нагрузкі”, — адзначаў у красавіку на пашыраным пасяджэнні праўлення Нацбанка начальнік упраўлення фінансавай стабільнасці Ігар Магілевіч.
belapan.by