Міністр нацабароны Літвы: Ніякіх ваенных пагроз Беларусі з боку Захаду няма
Літоўскі міністр падкрэсліў, што ратацыя сіл НАТА, у тым ліку ЗША, у Балтыйскім рэгіёне з'яўляецца "звычайнай практыкай, асабліва пасля 2014 года".
Ваенных ці іншых пагрозаў суверэнітэту Беларусі з боку Захаду няма, заявіў міністр нацыянальнай абароны Літвы Раймундас Каробліс. Яго выказванні апублікаваныя 23 кастрычніка на сайце літоўскага ваеннага ведамства.
Фота: Delfi
Напярэдадні дзяржсакратар Савета бяспекі Беларусі Станіслаў Зась паведаміў, што Аляксандр Лукашэнка даручыў Савету бяспекі і Міністэрству абароны ўнесці прапановы па мерах рэагавання на дзеянні, звязаныя з размяшчэннем у Літве ля мяжы з Беларуссю ваеннай тэхнікі і вайскоўцаў арміі ЗША.
„Літва непасрэдна зацікаўленая ў захаванні незалежнасці і тэрытарыяльнай цэласнасці Беларусі, а таксама ў развіцці эканамічнага супрацоўніцтва, — адзначыў Каробліс. — Таму я магу запэўніць вас, што няма ніякіх ваенных ці іншых пагрозаў суверэнітэту Беларусі, прынамсі, з боку Захаду. Да вясны [2020 года] колькасць дыслакаванага ў Літве [амерыканскага] батальёна не можа ўяўляць пагрозу для бяспекі Беларусі, таму мы сапраўды спадзяемся, што беларуская рэакцыя будзе адэкватнай”.
Літоўскі міністр падкрэсліў, што ратацыя сіл НАТА, у тым ліку ЗША, у Балтыйскім рэгіёне з’яўляецца „звычайнай практыкай, асабліва пасля 2014 года”. „Такія ратацыі адбываліся ў мінулым і будуць працягвацца ў будучыні. Мы лічым, што гэта з’яўляецца важным стрымальным фактарам для бяспекі ў нашым рэгіёне”, — растлумачыў ён.
Каробліс звярнуў увагу на тое, што перад прыбыццём амерыканскіх войскаў у Літву Міністэрства нацабароны і ЗША „загадзя падалі падрабязную інфармацыю аб прыбыцці батальёна: час прыбыцця, узбраенне і рыштунак, меркаваную працягласць знаходжання”. „Мы плануем працягнуць гэтую палітыку адкрытасці ў будучыні. Мы чакаем таго ж ад нашых суседзяў”, — адзначыў кіраўнік ваеннага ведамства.
Ён прызнаў, што ў апошнія гады інтэнсіўнасць ваенных вучэнняў НАТА па абароне Балтыйскага рэгіёну ўзрасла, але падкрэсліў, што „беларускаму боку вядомыя прычыны таго, чаму гэта адбываецца”, што яны „не маюць ніякага дачынення да Беларусі і не накіраваныя супраць яе”.
Міністр таксама адзначыў, што інфармацыя аб шырокамаштабных манеўрах НАТА Defender Europe 20, запланаваных на вясну наступнага года, „ужо была апублікаваная, і па меры набліжэння даты вучэнняў будзе даступна больш інфармацыі”.
Ён запэўніў, што „ў імя адкрытасці і ўмацавання даверу” Літва запросіць назіральнікаў з усіх суседніх краін, у тым ліку з Беларусі і Расеі. „Мы спадзяемся, што беларускі бок скарыстаецца гэтай магчымасцю ў наступным годзе”, — сказаў Каробліс.
Увечары 22 кастрычніка ў эфіры тэлеканала „Беларусь 1” дзяржсакратар Савета бяспекі Станіслаў Зась заявіў, што Беларусь негатыўна ацэньвае факт размяшчэння вайскоўцаў і цяжкай тэхнікі танкавага батальёна войскаў ЗША на літоўскім палігоне Пабрадэ — за 15 км ад літоўска-беларускай мяжы.
„Чаму мы ацэньваем гэты факт негатыўна? Таму што ў гэтай сітуацыі нельга быць проста назіральнікам. У любой краіне прапрацоўваюцца меры ў адказ. І кіраўнік дзяржавы паставіў задачу Дзяржсакратарыяту і Міністэрству абароны ўнесці прапановы па рэагаванні на гэты факт”, — расказаў дзяржсакратар Савета бяспекі. Паводле яго слоў, прапановы будуць прадстаўленыя Лукашэнку на пачатку наступнага тыдня.
Таксама Зась пракаментаваў насцярожанасць Беларусі з нагоды маючых адбыцца вучэнняў НАТО Defender Europe 20, звязаўшы яе з тым, што падчас гэтых манеўраў плануецца адпрацаваць пытанні перакідвання войскаў з тэрыторыі ЗША на еўрапейскі кантынент.
„Рэакцыя нашага галоўнакамандуючага, прэзідэнта Беларусі на гэтыя вучэнні не нейкая асаблівая, — зазначыў ён. — Яна роўная і адэкватная тым падзеям, якія намячаюцца ў наступным годзе. Гэта адны з самых буйных вучэнняў за апошнія 25 гадоў. У іх возьмуць удзел каля 40 тысяч ваенных з 18 краін — членаў НАТА. І прытым каля паловы гэтых ваеннаслужачых — з ЗША”.
У канцы верасня прэс-служба Міністэрства нацабароны Літвы паведаміла, што ў рамках аперацыі арміі ЗША ў Еўропе „Атлантычная рашучасць” у Літву прыбудуць больш за 500 ваеннаслужачых 1-га танкавага батальёна 9-га палка 1-й дывізіі арміі ЗША, а таксама 30 танкаў „Абрамс”, 25 баявых машын пяхоты „Брэдлі”, 70 колавых транспартных сродкаў.
У пачатку гэтага тыдня літоўскае ваеннае ведамства адрапартавала, што частка ваенных і цяжкай тэхнікі ўжо на тэрыторыі краіны.
Падраздзяленні сухапутных войскаў ЗША на ратацыйнай аснове служаць на тэрыторыі краін Балтыі і Усходняй Еўропы ў цэлым з вясны 2014 года ў рамках аперацыі „Атлантычная рашучасць”. Такім чынам ЗША дэманструюць саюзнікам па НАТО прыхільнасць „калектыўнай абароне і справе забеспячэння бяспекі пасля расійскай агрэсіі ва Украіне”.
Вучэнні НАТА Defender Europe 20 пройдуць вясной 2020 года на тэрыторыі 10 дзяржаў Еўрасаюза. У паведамленні на сайце арміі ЗША ў Еўропе гаворыцца, што амерыканскія войскі і тэхніка будуць знаходзіцца на гэтым кантыненце з лютага па ліпень 2020 года, самі манеўры плануецца правесці ў красавіку і маі. Чакаецца, што ў іх возьме ўдзел кантынгент 18 краін. У манеўрах плануецца задзейнічаць каля 37 тыс. ваеннаслужачых НАТА і краін-партнёраў, у тым ліку 20 тыс. амерыканскіх салдат.
belapan.by