Прысуд па справе Яна Морданя абвесцяць 20 снежня
Яна Морданя, жыхара вёскі Гацькі, судзяць за тое, што ён запісваў на мабільны тэлефон паседжанне супольных камісіяў Рады гміны Бельск-Падляшскі 27 жніўня гэтага года. Радныя шляхам галасавання вырашылі забараніць запіс. Калі Ян, спасылаючыся на права свабоды доступу да інфармацыі не пагадзіўся, была выклікана паліцыя.
Справа трапіла ў суд. І сёння ў акруговым судзе ў Бельску-Падляшскім праходзіў допыт сведкаў і абвінавачанага Яна Морданя. Пракурор прасіла прызнаць яго вінаватым.
Гаворыць Ян Мордань:
– Мне забаранілі радныя, бо яны чагосьці саромеліся. Я проста хацеў даведацца па справах грамадскіх, што там будзе цікавага, і пераказаць іншым людзям.
Міхал Сыкала з Калегіі адвакатаў у Беластоку:
– Тое, што дайшло да гэтага працэсу, можа мець такое значэнне, што суд урэшце вырашыць, ці мае рацыю грамадзянін у тым выпадку, калі карыстаўся сваім правам да атрымання інфармацыі, да фіксацыі інфармацыі з пасяджння Рады гміны, ці не.
Яна Морданя ў судовым працэсе падтрымала грамадзянская сетка Watchdog Polska, якая даслала ў суд “меркаванне сябра суда”, у якім звяртае ўвагу на тое, што гмінная ўправа ў Бельску-Падляшскім парушыла асноўныя грамадзянскія правы Яна Морданя, забараняючы запіс паседжання. 20-га снежня ў 12.30 у акруговым судзе ў Бельску-Падляшскім будзе абвешчаны прысуд ў справе.
Валя Лаеўская, Беларускае Радыё Рацыя