Яўгена Юшкевіча выпусцілі з СІЗА, а яго дзяўчыну затрымаў КДБ
Пра гэта паведамляе тэлеграм-канал motolkohelp.
Дзяўчына Яўгена Юшкевіча, Валерыя Андрэеўна Эйсмант, увечары 4 снежня была затрыманая цэнтральным апаратам КДБ. Паведамляецца, што Валерыя — былая супрацоўніца пракуратуры г. Менска.
Нагадаем, 4 снежня затрыманаму 24 лістапада былому следчаму Следчага камітэта, а цяпер андроід-распрацоўшчыку і ініцыятару праекта bychange.me Яўгену Юшкевічу была змененая мера стрымання на падпіску аб нявыездзе. Ён выйшаў з СІЗА на Валадарскага, але працягвае заставацца падазраваным паводле ч. 1 арт. 342 КК (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).
Яўгена Юшкевіча затрымалі 24 лістапада, каля 22.00, у сваёй кватэры ў Менску, дзе таксама прайшоў ператрус. Ён з’яўляецца падазраваным паводле ч. 1 арт. 342 КК (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Яму абралі меру стрымання ў выглядзе ўтрымання пад вартай, але пасля правядзення следчых дзеянняў сёння яму змянілі меру стрымання на падпіску аб нявыездзе.
Яўген Юшкевіч родам з Магілёва. У 2012 годзе скончыў юрфак БДУ. Быў у ліку пераможцаў студэнцкай юрыдычнай алімпіяды факультэта па прававых дысцыплінах.
Падчас вучобы два гады прапрацаваў пазаштатным супрацоўнікам у следстве Менскай пракуратуры, пасля —пяць гадоў следчым у СК. У 2017 годзе пайшоў з пасады старшага следчага аддзела па расследаванні эканамічных злачынстваў упраўлення Следчага камітэта па Менску. novychas.by