Палітык Купрадзэ: Грузія – непадзельная
Апошнія дні з Паўднёвай Асеціі паступае інфармацыя, што там пройдзе рэферэндум аб уваходзе ў склад Расеі. Грузінскія палітыкі лічаць такое рашэнне непрымальным, бо Грузія – непадзельная краіна.
Сітуацыю каментуе прадстаўнік партыі „Лело” ў Аджарыі Іраклі Купрадзэ:
– Каментаваць сепаратычны рух у грузінскіх рэгіёнах – гэта Цхінвалі і Сухумі, так званыя самапрызнаныя дзяржавы Паўднёвая Асеція і Абхазія, – гэта нерэальна з грузінскага боку, таму што ўвогуле не прызнаём такія суб’екты ў свеце. Іх акрамя Расеі прызнаюць толькі дзве краіны – Венесуэла і Куба, што рэальна смешна.
Палітык лічыць, што па гэтым пытанні ўсе апазіцыйныя партыі і кіраўніцтва краіны выступае адзіным фронтам:
– Усе апазіцыйныя партыі на гэта рашэнне, што адбываецца, думаюць аднолькава, нават кіраўніцтва краіны думае так, таму што гэта датычыцца не партыйных ці палітычных поглядаў, а гэта тычыцца адзінства нашай краіны – Грузіі. Думаю, што кіраўніцтва краіны і апазіцыя ў гэтым выпадку будуць адзінымі ў сваіх пазіцыях. Дакладна ўпэўнены, што гэта нічога не зменіць, таму што адзінства грузінскай дзяржавы прызнана і ААН, і Еўразвязам.
Міністэрства Замежных спраў Грузіі таксама выступіла 31 сакавіка 2022 года з заявай, што ўсе размовы пра рэферэндум у Цхінвальскім рэгіёне аб далучэнні да Расеі з’яўляюцца для Грузіі непрымальнымі.
Беларускае Радыё Рацыя