Вера Лапко выйшла ў 1/8 фіналу турніру ў Нур-Султане
Вера Лапко (356-ы нумар рэйтынгу ВТА) выйшла ў 1/8 фіналу турніру ў Нур-Султане. У матчы 1/16 фіналу Беларуска перайграла прадстаўніцу Казахстана Аружан Сагандыкаву — 6:3, 6:3.
Яшчэ адна беларуска Аляксандра Сасновіч (35-ы нумар рэйтынгу ВТА) правяла матч 1/8 фіналу турніру ВТА-250 у нямецкім Гамбургу. Сасновіч перамагла сербку Аляксандру Круніч (75 ВТА) з лікам 6:3, 6:2.
У Варшаве пройдзе турнір беларускіх аматарскіх каманд Польшчы ў знак салідарнасці з Івуліным
14 жніўня ў Варшаве пройдзе першы футбольны турнір беларускіх аматарскіх камандаў Польшчы ў знак салідарнасці з палітвязнем Аляксандрам Івуліным, якому 10 жніўня споўніцца 30 гадоў. У турніры плануецца ўдзел 8-10 каманд. Пераможцы і ўдзельнікі атрымаюць памятныя сувеніры і прызы ад “Беларускага Дома”.
Элеанор Патэрсан стала чэмпіёнкай свету ў скачках у вышыню
Аўстралійская лёгкаатлетка Элеанор Патэрсан атрымала перамогу ў спаборніцтвах па скачках у вышыню на чэмпіянаце свету па лёгкай атлетыцы, які праходзіць у амерыканскім Юджыне. Яна пакарыла вышыню 2,02 м з першай спробы. Галоўны фаварыт спаборніцтваў украінка Яраслава Магучых заняла другое месца. Яна ўзяла вышыню 2,02 м толькі з другой спробы. Трэцяе месца — у італьянкі Алены Валартыгары (яна ўзяла вышыню 2,00 м з першай спробы).
У агульнакамандным заліку ўпэўнена лідыруе зборная ЗША, заваяваўшы 6 з 25 залатых медалёў і ўсяго 18 з 75. Другімі ідуць эфіёпы (3-3-0), трэцімі – кенійцы (1-3-2).
Форвард зборнай Аргенціны Паўла Дзібала перайшоў у “Рому”
Нападнік Паўла Дзібала падпісаў кантракт з “Ромай”. Пра гэта паведамляе прэс-служба рымскага клуба. Тэрмін дзеяння пагаднення 28-гадовага футбаліста заканчваецца 30 чэрвеня 2025 года. Папярэднім клубам Дзібалы быў “Ювентус”.
Васькоў і Суша пакінулі дзяржынскі “Арсенал”
Як паведамляе прэс-служба футбольнага дзяржынскага «Арсенала», паўабаронцы Арцём Васькоў і Антон Суша спынілі супрацоўніцтва з клубам. 33-гадовы Васькоў згуляў 14 матчаў у чэмпіянаце (1 гол + 1 пас) і 1 матч у Кубку Беларусі. Арэндаваны ў менскага “Дынама” 22-гадовы Суша згуляў у 3 сустрэчах чэмпіянату і 1 сустрэчы Кубка Беларусі.
Беларускае Радыё Рацыя
Фота: tenniscircus.com
Artykuł Вера Лапко выйшла ў 1/8 фіналу турніру ў Нур-Султане pochodzi z serwisu БЕЛАРУСКАЕ РАДЫЁ РАЦЫЯ.