Паліна Шарэнда-Панасюк знайшлася ў калоніі для рэцыдывістак
Палітзняволеная Паліна Шарэнда-Панасюк знайшлася ў жаночай папраўчай калоніі № 24 (Зарэчча).
Пра гэта паведаміў на сваёй старонцы ў фэйсбуку яе муж Андрэй Шарэнда: „Паліна нарэшце знайшлася у жаночай папраўчай калоніі №24 (Зарэчча). Больш за месяц лукашысты хавалі яе месцазнаходжанне. За гэты перыяд Паліна правяла ў ШІЗА 20 содняў. ПК-24 – гэта калонія для жанчын рэцыдывістак, якія паўторна здзейснілі цяжкае злачынства. Яна знаходзіцца ў лесе паміж Рэчыцай і Светлагорскам і вядома вельмі жорсткімі ўмовамі ўтрымання. Таксама ПК-24 вядома кепскімі санітарнымі ўмовамі для вязняў і цяжкай фізічнай працай для зняволеных. Усе, хто там быў, кажуць, што мэта гэтай установы менавіта псіхалагічна зламаць чалавека і зрабіць з яго раба. Умовы і парадкі там блізкія да савецкага ГУЛАГУ».
Паліна Шарэнда-Панасюк была затрыманая ў студзені 2021 года. На яе завялі тры крымінальныя справы: паводле арт. 364 КК («Гвалт альбо пагроза выкарыстання гвалту ў дачыненні да супрацоўніка органаў унутраных справаў»), арт. 368 («Абраза прэзідэнта») і арт. 369 («Абраза прадстаўніка ўлады»). Усяго пацярпелымі па справе праходзілі сем міліцыянераў. Паводле версіі абвінавачвання, яна плюнула і ўдарыла аднаго з міліцыянтаў падчас агляду, а з іншага сарвала маску, астатніх абражала. Таксама жанчына нібыта дапусціла абразу Лукашэнкі. Тады яе асудзілі на два гады калоніі. Падчас знаходжання ў гомельскай калоніі 7 красавіка Паліну асудзілі па ч. 2 арт. 411 КК (злоснае непадпарадкаванне патрабаванням адміністрацыі папраўчай установы), дадаўшы яшчэ год зняволення.
„Берасцейскую Жану Д’арк” трэба падтрымаць лістамі. Новы адрас Паліны: ПК № 24. 247526, вул. Вытворчая, 44, г. п. Зарэчча, Рэчыцкі раён, Гомельская вобласць Шарэнда-Панасюк Паліне Сяргееўне.
Artykuł Паліна Шарэнда-Панасюк знайшлася ў калоніі для рэцыдывістак pochodzi z serwisu БЕЛАРУСКАЕ РАДЫЁ РАЦЫЯ.