Анатолю Казлову – 60
28 ліпеня беларускаму празаіку і літаратуразнаўцу Анатолю Казлову спаўняецца 60 гадоў з дня нараджэння.
Родам Анатоль з вёскі Асінаўка Краснапольскага раёна. Скончыў Асінаўскую пачатковую школу і пасля за сем кіламетраў наведваў Наваельненскую сярэднюю школу, дзе некалі вучылася яго маці у адным класе з Міхасём Стральцовым.
У 1980-м годзе Анатоль Казлоў паступіў у Гомельскі дзяржаўны ўніверсітэт, дзе пазнаёміўся з Анатолем Сысом, Алесем Бяляцкім, Вольгай Куртаніч, Эдуардам Акуліным, Ліляй Плыгаўкай і іншымі таленавітымі хлопцамі і дзяўчатамі.
Першая замалёўку “Завітаў чорны бусел” была надрукавана ў Краснапольскай раённай газеце, калі яшчэ вучыўся ў дзевятым класе. Шмат друкаваўся і калі вучыўся ва ўніверсітэце, наведваў літаб’яднанне, якім кіраваў паэт Віктар Ярац.
Пасля ўніверсітэта Анатоль служыў у войску, вучыўся ў аспірантуры Інстытута літаратуры імя Янкі Купалы пры АН Беларусі. Навуковым супрацоўнікам яго дысертацыі на тэму” Сатыра і гумар у беларускай літаратуры 1920-х-1930-х гадоў” быў Іван Навуменка. Як прыгадвае сам Анатоль, “пра гэтага чалавека і творцу ў маёй душы засталіся самыя цёплыя ўспаміны і ўзгадкі”. Потым Анатоль Казлоў працаваў у часопісах “Полымя”, “Маладосць”, быў рэдактарам “ЛіМа”…
У 1990 годзе ў бібліятэцы часопіса “Маладосць” выйшла першая кніга Анатоля Казлова “Міражы ценяў”. З друку выйшлі таксама кнігі “І тады я памёр…”, “Незламаная свечка”, “Юргон”, “Горад у нябёсах”, “Той, хто абганяе сны” і іншыя.
Шчыра віншуем спадара Анатоля з юбілеем і жадаем яму здароўя, творчага нахнення і шчасця.
Беларускае Радыё Рацыя
Artykuł Анатолю Казлову – 60 pochodzi z serwisu БЕЛАРУСКАЕ РАДЫЁ РАЦЫЯ.