На продаж выстаўлены ўнікальны кальвінскі храм ХVI стагоддзя
Продаж будынка храма ХVI стагоддзя абурыла гісторыка Цімафея Акудовіча, паведамляе REFORM.by.
Гісторык Цімафей Акудовіч адрэагаваў на нядаўнюю навіну пра продаж архітэктурнага будынка пастом у Фэйсбуку: «Дзіч нейкая. Як можа прадавацца храм XVI ст? Проста нагадаю, што храм быў збудаваны як кальвінскі збор у XVI ст. Пазней стаў каталіцкім і ўвайшоў у сядзібны комплекс Завішаў. Завішы — адзін з важнейшых менскіх шляхецкіх радоў на працягу некалькіх стагоддзяў».
Кальвінскі збор ХVI стагоддзя, размешчаны ў вёсцы Першамайск Уздзенскага раёна, выставілі на продаж па рашэнні Менаблвыканкама.
«Белрэстаўрацыя» ацаніла яго ў 46 тысяч рублёў. Калі праз нейкі час будынак не будзе прададзены, будуць памяншаць цану — спачатку да 70%, затым да 50%. Тэрмін продажу усталяваны да снежня 2024 года.
Уласна будынак размешчаны на тэрыторыі Уздзенскага дзяржаўнага сельскагаспадарчага прафесійнага ліцэя. Інфармацыйнаму агенцтву «Мінская праўда» ў ліцэі пацвердзілі інфармацыю пра тое, што гістарычны аб’ект прадаецца толькі для далейшай рэстаўрацыі.
Нагадаем, што помнік, які з’яўляецца гісторыка-культурнай каштоўнасцю, зараз знаходзіцца ў занядбаным стане. Ён пакрыты дахам, але сцены яго паступова разбураюцца.
Храм з’яўляецца часткай маёнтка Кухцічы, знакамітага сваёй прыналежнасцю сям’і Марыі Магдалены і Вацлавава Мікалая Радзівілаў, які апекваліся беларускай справай у пачатку ХХ стагоддзя (напрыклад, Марыя Магдалена дала грошы на выданне зборніка «Вянок» Максіма Багдановіча).
Artykuł На продаж выстаўлены ўнікальны кальвінскі храм ХVI стагоддзя pochodzi z serwisu БЕЛАРУСКАЕ РАДЫЁ РАЦЫЯ.