Валерый Сахашчык самлеў за рулём, не выключаецца версія з атручваннем
Як стала вядома «Нашай Ніве», апошнім часам міністр абароны ў кабінеце Ціханоўскай – Валерый Сахашчык двойчы быў у бальніцы.
Першы раз ён трапіў у бальніцу неўзабаве пасля заканчэння беларускай канферэнцыі ў Вільні. Пасля гэтага было некалькі сустрэч у Еўропе, візіт ва Украіну. Па вяртанні, адчуваў сябе не вельмі добра, кульмінацыяй чаго стаў выпадак тыднёвай даўніны — палітык страціў прытомнасць за рулём. На шчасце, з ім ехаў сын, ён перахапіў стырно і спыніў машыну. Першаснае абследаванне ў Польшчы паказала поўны парадак з органамі сардэчна-сасудзістай сістэмы.
З улікам наяўнасці іншых сімптомаў, такіх, як бяссонніца і крытычна зніжаная працаздольнасць, блізкія да Сахашчыка людзі дапускаюць, што прычынай можа быць атручванне. Паводле НН, праверка гэтай версіі плануецца ў знакамітай берлінскай клініцы «Шарытэ», дзе ў свой час быў на рэабілітацыі расійскі палітык Аляксей Навальны. Разам з гэтым, звяртаецца ўвага на стан павышанай эмацыйнай мабілізацыі падпалкоўніка Сахашчыка апошнім часам, што было выклікана работай і сямейнымі абставінамі. Гэта таксама магло выклікаць праблемы са здароўем.
Artykuł Валерый Сахашчык самлеў за рулём, не выключаецца версія з атручваннем pochodzi z serwisu БЕЛАРУСКАЕ РАДЫЁ РАЦЫЯ.