Ён пісаў пра лепшае ў жыцці
Беларускаму паэту і перакладчыку, заслужанаму работніку культуры Беларусі Аляксею Русецкаму (1912-2000) 4 снежня спаўняецца 110 гадоў з дня нараджэння.
Родам паэт быў з Касцюковіччыны. Закончыў пачатковую школу, Касцюковіцкую сямігодку і Аршанскі педтэхнікум. У 1931 годзе ён паступіў у Маскоўскі зоаветэрынарны інстытут. Працаваў ва ўпраўленні саўгасаў у Мінусінску, у бактэрыялагічных лабараторыях Масквы і Менска. Са студзеня 1942 года быў на фронце. Служыў начальнікам палявой лабараторыі на Калінінскім, Заходнім, Трэцім Прыбалтыйскім франтах. У Менск вярнуўся ў 1947 годзе. Да 1951 года працаваў літкансультантам па паэзіі ў СП Беларусі, у 1951 годзе Аляксей Русецкі загадваў аддзелам публіцыстыкі, а таксама працаваў у менскіх літаратурных часопісах.
З допісамі ў рэспубліканскім друку пачаў выступаць у 1930 годзе. Першыя зборнікі паэзіі «У заўтрашні свет» і «Святло акон тваіх» прысвечаны біяграфіі ваеннага пакалення. Пазней выдаў зборнікі паэзіі «Служба святла», «Зямля гаворыць зорам», «Позірк», «Хвала жыццю» і многія іншыя.
За кнігу вершаў «Крокі сэрца» прысуджана Літаратурная прэмія імя Аркадзя Куляшова ў 1981 годзе. Быў узнагароджаны двума ордэнамі Айчыннай вайны II ступені, Чырвонай Зоркі і медалямі.
У 1985 годзе ў адным са сваіх вершаў паэт напісаў:
Адспявала ў жыце перапёлачка
Без мяне пра лепшае ў жыцці…
Не хачу ў нябёсы дыму воблачкам,
Мне ў зямлю, сваю зямлю сысці б.
Беларускае Радыё Рацыя
Artykuł Ён пісаў пра лепшае ў жыцці pochodzi z serwisu БЕЛАРУСКАЕ РАДЫЁ РАЦЫЯ.