Մենք քվեարկելու ենք. կատալոնացիները քվեարկությանն ընդառաջ փողոց են դուրս եկել՝ ի հեճուկս ոստիկանական գործողությունների
Կատալոնիայի անկախության հազարավոր կողմնակիցներ կիրակի ցույցեր և հանրահավաքներ են կազմակերպում ինքնավար մարզի քաղաքներում՝ ի պատասխան անկախության հանրաքվեն տապալելու Մադրիդի փորձերի:
Այս մասին հաղորդում է Reuters գործակալությունը՝ հիշեցնելով, որ անցյալ շաբաթ իսպանական ոստիկանությունը ձերբակալել է 12 կատալոնացի պաշտոնյայի, որոնք պատասխանատու են հոկտեմբերի 1-ին նախատեսված հանրաքվեի կազմակերպման համար: Օրինապահները նաև մեծ քանակությամբ թռուցիկներ, բուկլետներ և տեղեկատվական նյութեր են առգրավել:
Ոստիկանական գործողությունները հանգեցրել են մի քանի օր տևող ցույցերի Բարսելոնայում:
Այնուամենայնիվ Կատալոնիայի կառավարության՝ Ժեներալիտետի ղեկավար Կառլես Պուչդեմոնը հայտարարել է, որ հանրաքվեն տեղի կունենա:
Կենտրոնական Բարսելոնայում հավաքված ցուցարարները վանկարկում են «Մենք քվեարկելու ենք» արտահայտությունը:
Մադրիդը 3000-4000 ոստիկանի է ուղարկել Կատալոնիա մյուս շրջաններից: