Գերմանիայի ընտրությունների արդյունքները վկայում են Եվրոպայում փոփոխությունների անհրաժեշտության մասին. Իտալիայի վարչապետ
Կիրակի Գերմանիայում անցկացված խորհրդարանական ընտրությունների արդյունքները վկայում են Եվրոպայում լուրջ փոփոխություններ անցկացնելու անհրաժեշտության մասին: Այս մասին ասել է Իտալիայի վարչապետ Պաոլո Ջենտիլոնին:
«Եվրոպային վերաբեռնավորում է անհրաժեշտ: Ես տեսել եմ գերմանական ընտրությունների արդյունքները, և բարդություններն ու մտահոգությունները չեն վրիպել ինձնից», - ասել է վարչապետը կամավորների և քաղաքացիական ակտիվիստների հետ հանդիպման ժամանակ:
Ջենտիլոնին հույս է հայտնել, որ Գերմանիայի կանցլեր Անգելա Մերկելն Իտալիայի և Ֆրանսիայի հետ կշարունակի ջանքերը Եվրոպայի փոխակերպման ուղղությամբ՝ քաղաքացիների սպասումներին պատասխան տալու համար:
«Ծայրահեղականության լավագույն պատասխանը խնդիրների լուծումն է աշխատանքի, ներդրումների և ներգաղթի ոլորտում»,- նշել է Իտալիայի վարչապետը:
Հիշեցնենք, որ Գերմանական կենտրոնական ընտրական հանձնաժողովի վերջնական տվյալների համաձայն՝ Քրիստոնեա-դեմոկրատական միություն/Քրիստոնեա-սոցիալական միություն դաշինքը զբաղեցրել է առաջատար դիրք՝ 33 տոկոս ձայնով, դա վատագույն արդյունքն է 1949 թվականից ի վեր: Մարտին Շուլցի գլխավորած Գերմանիայի սոցիալ-դեմոկրատական կուսակցությունը ստացել է 20,5 տոկոս ձայն՝ նույնպես գրանցելով պատմության ընթացքում վատագույն արդյունքը: «Այլընտրանք Գերմանիայի համար» կուսակցությունը ստացել է 13 տոկոս ձայն, ինչը թույլ կտա նրան զբաղեցնել նոր խորհրդարանի 709 տեղից 94-ը: