2018թ.-ի ապրիլից հետո վարչապետը չի կարող ունենալ նվազեցված լիազորություններ պաշտպանության և անվտանգության ոլորտում. Վիգեն Սարգսյան
2018թ.-ից հետո վարչապետը չի կարող ունենալ նվազեցված լիազորություններ պաշտպանության, անվտանգության ոլորտում: Tert.am-ի հետ զրույցում այս մասին ասաց ՀՀ պաշտպանության նախարար Վիգեն Սարգսյանը՝ պատասխանելով այն հարցին`արդյոք Ազգային ժողովին ներկայացված «Պաշտպանության մասին» նոր օրենքը նպատակ ունի՞ 2018թ.-ին օրենսդրորեն նվազեցնել վարչապետի լիազորությունները պաշտպանության ոլորտում:
«Նման բան հրապարակող մամուլը պարզապես ծույլ է, որովհետև պետք է նստել օրենքը, Սահմանադրությունը կարդալ ու տեսնել, որ Անվտանգության խորհրդի ղեկավարը վարչապետն է: Երկրի անվտանգության ապահովման համար կարևոր է, որ կոլեկտիվ պատասխանատվություն լինի, հնարավոր կոալիցիոն կառավարության պարագայում վարչապետ-կառավարություն-Անվտանգություն խորհուրդ-Ազգային ժողով փոխհարաբերություններ լինեն: Մենք կատարելու ենք շատ մանրակրկիտ աշխատանք այդ փոխհարաբերությունները ճիշտ դասավորելու համար»,-ասաց նա:
Վիգեն Սարգսյանը նշեց, որ վստահ է՝ Ազգային ժողովում կհնչեն խելացի առաջարկներ, մտքեր, որոնք անպայման հաշվի կառնվեն:
«Ակնհայտ է, որ մարդիկ, ովքեր գրում են նման բաներ, չեն հասկանում, թե ինչ է նշանակում Զինված ուժերի գերագույն գլխավոր հրամանատար պատերազմի ժամանակ, չեն հասկանում, որ վարչապետը չի կարող ունենալ նվազեցված լիազորություններ պաշտպանության և անվտանգության ոլորտում 2018թ.-ի ապրիլից հետո»,-նշեց Վիգեն Սարգսյանը: