Փողոցային պայքար չի լինի, փոխարենը պարտադիր կուտակային կենսաթոշակային համակարգի մասին նոր նախագիծ կներկայացնի ԱԺ. Գևորգ Գորգիսյան
Ազգային ժողովը հաստատել է «Կուտակային կենսաթոշակների մասին» օրենքում փոփոխություններ և լրացումներ կատարելու մասին նախագիծը, որով կառավարությունն առաջարկում է պարտադիր կուտակային կենսաթոշակային համակարգում ներառել նաև ՀՀ-ում գործող միջազգային կազմակերպությունների այն աշխատակիցներին, որոնք հանդիսանում են ՀՀ քաղաքացիներ: Սակայն Tert.am-ի հետ զրույցում ԱԺ «Ելք» խմբակցության քարտուղար Գևորգ Գորգիսյան, ով նախկինում «Դ!ԵՄ » շարժման անդամ էր, նկատեց, որ իրականում, օրենքում որևէ էական փոփոխություն չի եղել:
«Միջազգային կազմակերպությունների աշխատակիցները նույնպես դառնում են պարտադիր կուտակային կենսաթոշակային համակարգի անդամ: Կրկին մանիպուլյացիա է, քանի որ ասվում է, թե այս դրույթով ԵԱՏՄ-ն մեզ շատ փող կտա: Ոչ, ԵԱՏՄ-ն չի տալու, այդ ԵԱՏՄ-ում աշխատող հայ քաղաքացին է իր աշխատավարձից մի մաս պոկելու է տալու այս համակարգին: Փողը տալու է մի համակարգի, որտեղից վերադարձը չի երաշխավորվում և այլն»,- ասաց նա:
Գևորգ Գորգիսյանին զարմացնում է՝ ինչու է նախագիծը կրկին ԱԺ բերվել, եթե հենց այս պահին դեռևս գործող օրենքի հետ խնդիրներ կա՝ որոշ դրույթներ հակասահմանադրական են: Նա նկատեց՝ կա նաև Սահմանադրական դատարանի վճիռ, որը դեռևս կյանքի չի կոչվել:
«Մինչև այդ Սահմանադրական դատարանի վճիռը կյանքի չի կոչվել, այդ նախագիծը կրկին ԱԺ բերելն անմտություն է, որովհետև գործող օրենքն ինքնին հակասահմանադրական է»,- շարունակեց Գորգիսյանը:
Նախկին «Դ!ԵՄ»-ի անդամը, պատասխանելով հարցին, թե հնարավոր է կրկին փողոցային պայքար սկսվի նախագծի դեմ, հաշվի առնելով, որ «Ելք» խմբակցության պատգամավորներից որոշներ նախկին «Դ!ԵՄ»-ականներ են, ասաց, թե այս նախագիծն այդքան չարժե: Փողոցային պայքարի փոխարեն «Ելք» խմբակցությունը որոշել է այլընտրանքային նախագիծ ներկայացնել, քանի որ, ըստ նրա, կրկին ԱԺ բերած նախագծում մանր-մունր փոփոխություններ են արված: Խոսելով ապագայում ներկայացվելիք նախագծի մասին՝ Գորգիսյանն ասաց, թե հիմնական շեշտադրումը կամավորություն սկզբունքն է լինելու:
«Այս նախագիծը գլոբալ առումով այդքան արժեք չունի, ոչինչ է, քանի որ մի ստորակետ այս կողմ է դրված, մյուսն՝ այն կողմ և այլն: Մենք այլընտրանքային նախագիծ ենք ներկայացնելու, որի ուղղությամբ դեռևս աշխատում ենք, այն շատ ծավալուն ու լուրջ բան է լինելու: Մենք առաջարկելու ենք կամավորության սկզբունքը, որովհետև միշտ ասել ենք, որ միայն կամավորության սկզբունքի վրա կարող է այս մեխանիզմն աշխատել: Եթե դու ապրանք ունես, որը չես կարողանում մարդկանց վրա վաճառել, նշանակում է՝ վատն է, պետք է լավացնել: Հիմա, եթե քաղաքացին կամավոր չի ցանկանում իր գումարները ներդնել այդտեղ, նշականում է՝ վատ նախագիծ է, այդտեղ ինքը չի տեսնում հեռանակար»,- ընդգծեց Գևորգ Գորգիսյանը:
Պատգամավորը վստահ է՝ կամավորության հիմունքներով հնարավոր է ստեղծել համակարգ, որը կաշխատի, ավելին՝ իրենք կներկայացնեն մեխանիզմները: Հարցին՝ հետևել են արդյո՞ք ֆոնդերը, որոնց տրվում է պարտադիր կուտակային կենսաթոշակային համակարգի միջոցով գանձվող գումարներ, շահույթո՞վ են աշխատում, Գևորգ Գորգիսյանը պատասխանեց, թե ըստ պաշտոնական տվյալների՝ շահույթով են աշխատում, բայց նկատեց, որ ֆոնդերի դեռևս 3 տարի է, ինչ գործում են:
«Երեք տարի է՝ գործում են, բայց այնտեղ ներդրված գումարները 30 տարվա համար են, դժվար է ասել, թե տարիներ հետո ինչ կլինի: Որևէ կերպ երաշխավորված չէ, թե այդ ֆոնդերն ինֆլյացիայի նկատմամբ ինչ զգայունություն ունեն: Հետագայում կարող ենք ստանալ 200 հազար դրամ թոշակ, բայց պարզվի, որ դրանով մենք կկարողանանք գնել 2 կգ շաքարավազ: Նույնիսկ, եթե փոխհատուցում կատարվի, միևնույն է, պաշտոնական ինֆլյացիան ներկայացնում է մոտ 5 տոկոս: Բայց մի անգամ հաշվարկ էինք արել, որ 90-կան սկզբին հացը 10 դրամ էր, եթե տարեկան 5 տոկոսով աճած լիներ գինը, ապա հացը պետք է լիներ 20 դրամ, բայց հացը՝ 200 դրամ է: Հետևաբար, նույնիսկ 5 տոկոսի փոխահատուցումը տրամադրվի, ՀՀ բյուջեն բավարար չի ինֆլյացիան փակելու համար: Ստացվում՝ քաղաքացին կրկին տուժում է»,- եզրափակեց Գևորգ Գորգիսյանը: