Մեկից երեք տարվա ընթացքում Լարսին այլընտրանքային ցամաքային ճանապարհ կունենանք. Շիրակ Թորոսյան
Լարսին այլընտրանքային ճանապարհ է լինելու: Այս հայտարարությունն արել է ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը: Tert.am-ն էլ ՀՀ ԱԺ խմբակցության պատգամավոր Շիրակ Թորոսյանից փորձեց պարզել, թե ի՞նչ այլընտրանքային ճանապարհի մասին է խոսքը՝ հաշվի առնելով, որ Աբխազիայի հետ համագործակցության դեպքում, հայկական կողմը կարող է խնդիրներ ունենալ պաշտոնական Թբիլիսի հետ:
Թորոսյանի գնահատմամբ՝ այս պահին ՀՀ-ն չի էլ կարող Աբխազիայի հետ ճանապարհ ունենալ, քանի որ Աբխազիայով անցնող ճանապարհն անցնում է Վրաստանով: Միևնույն ժամանակ նա նկատեց, որ աբխազական երկաթուղին սարերի հետևում չէ:
«Եթե պետք է բացվի աբխազական երկաթուղին կամ թեկուզ խճուղային ճանապարհն, ապա այստեղ առնվազն հարկավոր է ռուս-վրաց- աբխազական փոխհամաձայնություն, որը մի օր լինելու է: Կարծում եմ՝ այս որոշումը 7 սարի հետևում չէ»,- ասաց նա:
Պատգամավորը շեշտեց, թե ալտերնատիվ ճանապարհ ասելով չի կարելի միայն աբխազական ճանապարհ հասկանալ, քանի որ դրա գործարկումը օբյեկտիվ ու սուբյեկտիվ պատճառներով կարող է հետաձգվել: Նրա կարծիքով՝ խոսքը բոլորովին այլ ճանապարհի մասին է, որը Վրաստանն ուղիղ ՌԴ-ին է կապում:
«Այդպիսի ճանապարհի հնարավորություն կա: Հավանաբար, լսած կլինեք, որ հաջորդ տարի Լարսում թունելների կառուցում է սկսվելու, որը նման է այլընտրանքային ճանապարհի: Այն հնարավորություն է տալու ձմռան ամիսների այդ անանցանելիությունը, փլուզումները շրջանցել: Բայց ինչքան մենք հասկանում ենք`խոսքը նաև այլ ճանապարհի մասին է, որն առաջիկայում կլինի ու տարին 12 ամիս կօգտագործվի: Այդ ճանապարհը Վրաստանն ուղիղ ՌԴ-ին է կապում»,-շարունակեց պատգամավորը:
Հարցին՝ ճանապարհը ո՞ր կողմով է անցնելու, Շիրակ Թորոսյանը պատասխանեց. «Այս մասին դեռևս չի բարձրաձայնվել, բայց ես դիմել եմ վարչապետին, նա պատասխանել է, թե Լարսին հստակ այլընտրանք է լինելու, կա հավանական տարբերակ: Այս պահին լուծումները քննարկվում են»:
Դիտարկմանը, որ այս պահին Լարսի այլընտրանքային ճանապարհը միայն լաստանավայինն է, սա պետք է ավելի խորացնե՞ն, Թորոսյանն արձագանքեց. «Լաստանավային ճանապարհից մենք հաճախ ենք օգտվում, երբ Լարսում փլուզումներ են լինում, այն բավականին արդյունավետ է: Բայց այն Փոթից կամ Բաթումից բեռնատար մեքենաները հասցնում է ՌԴ, սակայն չի կարող այնքան արդյունավետ լինել, որքան երկաթուղայինը կամ ավտոտրասնպորտայինը: Մեծ հույս ունենք, որ առաջիկա ժամանակահատվածը`նկատի ունեմ 1, 2, 3 տարին, Լարսին այլընտրանք կունենաք, բացի լաստանավայինից։ Խոսքը ցամաքային ճանապարհի մասին է: Իհարկե, հրաշալի կլիներ նաև աբխազական գծի բացումը»: