Ֆրանսիայում գտնվող «Հյուսիսային Կատալոնիայի» բնակիչները ցույցի են դուրս եկել՝ ի աջակցություն կատալոնացիների
Ֆրանսիայի հարավում գտնվող Արևելյան Պիրենեյներ շրջանում, որը հայտնի է նաև «Հյուսիսային Կատալոնիա» անունով, նույնպես լարված իրավիճակ է՝ կապված Կատալոնիայի անկախության հանրաքվեի շուրջ ստեղծված իրավիճակի հետ:
Ինչպես հայտնում է Agence France Presse-ը, Կատալոնիայի հետ սահմանի մոտ գտնվող այս շրջանում, որը Ֆրանսիան գրավել է 17-րդ դարում, շուրջ 2000 մարդ է ցույցի մասնակցում՝ ի աջակցություն կատալոնացիների ինքնորոշման իրավունքի:
Ցույցի մասնակիցներն իրենց համերաշխությունն են հայտնում Կատալոնիայում մեծամասնության որոշմանը, թեև իրենք մտադրություն չունեն դուրս գալու Ֆրանսիայի կազմից:
Ցուցարարներից ոմանք նշում են, որ ընտանեկան կապեր ունեն Կատալոնիայում և այնտեղ են մեկնում հանգստյան օրերին: Ֆրանսիայում բնակվող 470 000-անոց համայնքը նույնպես կատալոներեն է խոսում:
Հիշեցնենք, որ այսօր հազարավոր մարդիկ կիրակի դուրս են եկել Բարսելոնայի կենտրոնական փողոցներ` բողոքելով Իսպանիայից անջատվելու Կատալոնիայի կառավարության մտադրության դեմ: