Երկու քույրերի պատմությունը. հնդկուհիներն ամեն օր 6 ժամ են ծախսում դեպի դպրոց տանող դժվար ճանապարհն անցնելու համար (լուսանկարներ)
Հիմալայների հնդկական գյուղերից մեկում բնակվող քույրեր Ռադիկան և Յասհոդան ամեն օր 6 ժամ են ծախսում դպրոց գնալու և վերադառնալու ճանապարհին, սակայն կարծում են, որ հանուն կրթության արժի զրկանքներ կրել:
Աղջիկների միջազգային օրվա առթիվ BBC-ն անդրադարձ է կատարել ուսումնատենչ քույրերի պատմությանը: Նրանք սովորաբար արթնանում են առավոտյան ժամը հինգին, լվացվում են, նախաճաշում և զվարթ պատրաստվում երկարատև ուղևորությանը լեռնային կածանով:
Անդունդներ, քարաժայռեր և վարար գետ. այս բնական խոչընդոտները նրանց ամենօրյա ճանապարհի մասն են կազմում:
Ութարախանդ նահանգի Սյաբա գյուղում բնակվող աղջիկները 14 և 16 տարեկան են: Հարևան գյուղերում ևս մի քանի սովորող աղջիկներ կան, որոնք նույնպես դժվարին ճանապարհ են հաղթահարում:
Դեպի դպրոց ճանապարհը տևում է 2-3 ժամ: Նրանց ճանապարհն անցնում է գետի վրայով գնացող ճոպանուղով, ապա ոտքով:
Նրանք երկուսն էլ չեն ցանկանում ծնողների պես շուտ ամուսնանալ, այլ մտադիր են շարունակել ուսումը: