Դատավորները սխալ վճիռների համար ոչ միայն նյութական, այլև քրեական պատասխանատվության պետք է ենթարկվեն. փաստաբան
ՀՀ-ում դատավորները ոչ միայն նյութական, այլ նաև քրեական պատասխանատվության պետք է ենթարկվեն իրենց կայացրած սխալ վճիռների համար:
Այս մասին Tert.am-ի հետ զրույցում ասաց փաստաբան Լուսինե Սահակյանը՝ անդրադառնալով արդարադատության նախարար Դավիթ Հարությունյանի այն հայտարարությանը, որ անթույլատրելի է, որ Եվրոպական դատարանի որոշումների համար տեղացի դատավորներն էլ պատասխանատվություն կրեն։
«Միանշանակ դատավորները պետք է պատասխանատու լինեն. այն, որ իրենք պատասխանատու չեն իրենց կայացրած ապօրինի որոշումների համար, հենց հանգեցնում է նրան, որ խախտումները կրկնվեն: Եթե ուսումնասիրելու լինենք, կտեսնենք, որ միևնույն դատավորների կայացրած դատական ակտերի պատճառով ՄԻԵԴ-ը մի քանի խախտում է ճանաչել, և պետությունը դրա համար պատասխանատվություն է կրում»,-ասաց Լուսինե Սահակյանը՝ հավելելով, որ եթե դատավորները պատասխանատվության ենթարկվեն, ապա կբացառվեն նրա կողմից խախտումների կրկնությունները:
Հարցին, թե եթե նախարարն ասում է, որ պատասխանատվությունը դատավորները չպետք է կրեն, այդ դեպքում ինչպե՞ս շտկել իրավիճակը, ի՞նչ մեխանիզմներ կան, Սահակյանն ասաց, որ ինքն այլ մեխանիզմներ չի տեսնում:
«Մեխանիզմները պետք է պատասխանատվությամբ արտահայտվեն, որովհետև շատ դատական ակտեր հանգեցնում են նրան, որ նրանք պետք է քրեական պատասխանատվության ենթարկվեն, բայց ՀՀ-ում այդպիսի դեպք չի գրանցվել, որ դատավորները, քննիչները, դատախազները ենթարկվեն քրեական պատասխանատվության, դրա արդյունքում էլ խախտումները շարունակվում են: Այսինքն՝ ոչ միայն նյութական պատասխանատվության մասին պետք է խոսել, այլ նաև քրեական»,-ասաց փաստաբանը:
Դիտարկմանը, թե «Վարդանյանն ու Նանուշյանն ընդդեմ Հայաստանի» գործով ՄԻԵԴ-ն անդրադարձել էր նաև Վճռաբեկ դատարանի նախագահ Արման Մկրտումյանին՝ նշելով նրա կողմից անկողմնակալության սկզբունքի խախտման մասին, սակայն դատավորը կրկին պատասխանատվության չենթարկվեց, Լուսինե Սահակյանն ասաց, որ որևէ նորմալ, իրավական երկրում նման դատավորներն առնվազն չպետք է պաշտոնավարեին:
«Ես չեմ կարող պատկերացնել որևէ իրավական պետություն, որտեղ Եվրոպական դատարանի նման որոշում կայացնելուց հետո նշված անձը կշարունակի պաշտոնավարել, բայց նա շարունակում է պաշտոնավարել, իսկ մյուսներն էլ տեսնում են, որ խախտում թույլ տված դատավորները որևէ պատասխանատվության չեն ենթարկվում: Սրանից ելնելով՝ խախտումները շարունակվելու են»,-ասաց Սահակյանը: