100 մլն դոլարի զենք գնելու համար ՌԴ վարկն ամրացնում է ՀՀ անվտանգության դիրքերը, վերականգնում է ռազմական հավասարակշռությունը. Կոլերով

Ռուսաստանը Հայաստանին զենքի գնման համար 100 միլիոն վարկ է տրամադրում և այդպիսով ռազմական հավասարակշռություն է ապահովում Հայաստանի և Ադրբեջանի միջև: Այս մասին Tert.am-ի հետ զրույցում ասաց ռուսաստանցի քաղաքական վերլուծաբան Մոդեստ Կոլերովը: Քաղաքական վերլուծաբանը նշեց, որ Հայաստանը զենքեր է գնում ներքին շուկայական գներով, իսկ Ադրբեջանն՝ ավելի թանկ, այնպես որ ռազմական հավասարակշռությունն ապահովվում է, և պետք չէ խաբվել այն թվերին, որ Ադրբեջանին վաճառվել է 5 միլիարդի զենք:

- Ռուսաստանը 100 միլիոն դոլարի վարկ է տրամադրելու Հայաստանին՝ իրենց արտադրության զենքերը գնելու համար: Սա այն դեպքում, երբ Հայաստանը դեռ չի մարել նույն նպատակով տրամադրված նախորդ վարկը, չի ստացել զենքի ողջ խմբաքանակը:

- Կարծում եմ, որ դեռևս նախորդ վարկը չմարած՝ Ռուսաստանը Հայաստանին նոր վարկ է տրամադրում, որովհետև բավարարված է Հայաստանի պարտավորությունների կատարմամբ: Այսինքն՝ Ռուսաստանը գոհ է վարկի մարման ժամկետներից և դրա սպասարկման ձևից: Բացի այդ, Ռուսաստանը հասկանում է, որ Հայաստանն անվտանգությանն ուղղված միջոցների մեծացման կարիք ունի և տրամադրում է նոր վարկ, որը կնպաստի անվտանգության ամրապնդմանը: Հայաստանը սպառազինության համալրմամբ հավասարեցնում է դիրքերը Ադրբեջանի նկատմամբ և սա, ըստ էության, նպատակ ունի ապահովել ռազմական հավասարակշռությունը:

Այո, Ռուսաստանից շատ են հնչում կարծիքներ, որ Ռուսաստանն ունի Ադրբեջանին զենք վաճառելու իրավունք, բայց միաժամանակ Ռուսաստանում կարծում են, որ այդ պարագայում Հայաստանի ու Ադրբեջանի միջև ռազմական հավասարակշռությունը խախտվում է և կա բալանսը վերականգնելու անհրաժեշտություն: Այս վարկի միջոցով Ռուսաստանը ամրացնում է Հայաստանի անվտանգության դիրքերը, վերականգնում է ռազմական հավասարակշռությունը: Սա օգտակար կլինի Հայաստանի համար: Բացասական երանգներ այս գործարքում ես չեմ տեսնում:

- Հայաստանում ռազմական որոշ փորձագետներ ասում են, որ ռազմական հավասարակշռությունն ամեն դեպքում չի վերականգնվում, որովհետև Ադրբեջանին վաճառվել է 5 միլիարդ դոլարի սպառազինություն, իսկ Հայաստանին՝ ընդհանուր առմամբ 300 միլիոն դոլարի զենք:

- Ո՞վքեր են ռազմական այդ փորձագետները: Խնդրում եմ՝ հարց տվեք նրանց, երբ տեսնեք, նայեք նրանց աչքերի մեջ ու հարցրեք՝ եթե համարում ես քեզ փորձագետ, ինչո՞ւ ես նման հիմարություններ ասում: Եթե քեզ ռազմական փորձագետ ես համարում, ուրեմն պետք է լավ իմանաս, որ Հայաստանը Ռուսաստանից զենք է գնում ներքին գներով, իսկ Ադրբեջանը՝ միջազգային: Ադրբեջանի համար այդ զենքը մի քանի անգամ թանկ է, իսկ Հայաստանի համար՝ էժան: Հայաստանը ՀԱՊԿ անդամ է, Հայաստանը Ռուսաստանի հետ ռազմական համագործակցության մասին պայմանագիր ունի, դրա համար զենքը Հայաստանի համար էժան է:

- Շաբաթներ առաջ Հայաստանի պաշտպանության նախարարը Չինաստանում էր, որտեղ հայտարարեց, որ Հայաստանը հետաքրքրված է չինական զենքի գնմամբ: Արդյո՞ք նոր վարկի տրամադրումը Հայաստանը Ռուսաստանից կախման մեջ պահելու համար է արվում:

- Հայաստանն արդեն 100 տոկոսով կախված է ռուսական զենքից: Սրանից ավելի շատ այն էլ չի կարող կախման մեջ լինել: Հայաստանը կարող է Չինաստանից գնել այլ տեսակի զենք, այնպիսի զենք, որը չի կարող գնել Ռուսաստանից, հակառակ դեպքում՝ ո՞րն է իմաստը: Կարծում եմ, որ վարկի տրամադրման որոշումը կայացվել է Վիգեն Սարգսյանի Չինաստան այցելությունից առաջ:

- Կարծում եք, որ Ռուսաստանը խանդով չի՞ վերաբերվի, եթե Հայաստանը սպառազինության ոլորտում համագործակցի այլ պետությունների հետ, թույլ կտա՞, որ ՀՀ-ն զենք գնի ուրիշ երկրներից:

- Չեմ կարող պատասխանել այս հարցին: Ովքեր կարծում են, որ Ռուսաստանը թույլ չի, որ Հայաստանը համագործակցի ուրիշ պետությունների հետ, թող ապացուցեն դա, չի կարելի լինել ինտելեկտուալ, նստել խոհանոցում ու նման մտքեր հայտնել: Ես չեմ լսել նման հայտարարություններ ռազմական փորձագետներից, զինվորականներից: