«Արցախի» գլխավոր մարզիչ. Մեր ուժերը կենտրոնացրել ենք առաջնության հանդիպումների վրա
Հայաստանի Գավաթի խաղարկության քառորդ եզրափակչի պատասխան խաղում «Ալաշկերտը» սեփական հարկի տակ 6:0 հաշվով հաղթել է «Արցախին» և դուրս եկել կիսաեզրափակիչ:
Խաղից հետո «Արցախի» գլխավոր մարզիչ Տիգրան Եսայանը պատասխանել է լրագրողների հարցերին:
- Ի՞նչ կասեք խաղի մասին:
- Առաջին հերթին շնորհավորում եմ «Ալաշկերտին» հաղթանակի կապակցությամբ: Ինչ վերաբերվում է մեր խաղին, ապա պետք է նշեմ, որ ամբողջովին ձախողվեցինք: Ճիշտ է, սպասում էինք, որ դժվար է լինելու, սակայն ոչ այս հաշվով: Առաջին խաղի համեմատ փոփոխություններ էինք կատարել, քանի որ երեք օր առաջ խաղ էինք անցկացրել: Փորձեցինք երիտասարդներին հնարավորություն տալ,սակայն փորձը ցույց տվեց, որ երիտասարդները դեռ շատ սովորելու բան ունեն: Ամբողջովին ձախողվեցինք:
- Այսպիսի կազմ էիք ընտրել, քանի որ երեք օր առաջ խաղ էի՞ք անցկացրել:
- Ոչ, քանի որ մեր ուժերը կենտրոնացրել ենք առաջնության խաղերի վրա և հոկտեմբերի 23-ին կարևոր խաղ ունենք անցկացնելու: Այդ պատճառով հիմնական կազմի ֆուտբոլիստներին հնարավորություն տվեցինք հանգստանալ: Բայց, իհարկե, պարտությունը արդարցում չունի: Սպասում էինք, որ ծանր է լինելու: