Քաղաքական շատ ուժեր շատ են խոսում մրցակցության մասին, ժամանակը գալիս է` արհամարհում են այդ ընտրությունները. Էդուարդ Շարմազանով
ՀՀԿ-ի շանսերը ՏԻՄ ընտրություններին բավական բարձր են: Այսօր ՀՀԿ գործադիր մարմնի նիստի ավարտից հետո նման հայտարարություն արեց ՀՀԿ խոսնակ, ԱԺ փոխնախագահ Էդուարդ Շարմազանովը:
«Քաղաքական շատ ուժեր շատ են խոսում մրցակցության մասին, ՀՀԿ-ի դեմ պայքարի մասին, սակայն երբ ժամանակը գալիս է, նրանք արհամարհում են այդ ընտրությունները, կամ չեն կարևորում կամ չունեն թեկնածուներ, որպեսզի կարողանան արդար մրցապայքարում պատշաճ մրցակցություն ապահովել»,-ասաց նա:
Շարմազանովի խոսքով՝ նիստի ընթացում քննարկել են ՀՀ ներքին և արտաքին քաղաքական խնդիրները: Ըստ նրա՝ ուշադրության կենտրոնում է եղել նաև ԱԺ հաջորդ քառօրյայում քաղաքական մեծամասնության անելիքներն, ինչպես նաև տարբեր վեհաժողովներում պատգամավորների գործունեությունը:
Նշեք, որ ՏԻՄ ընտրություններում հիմնականում համայնքի ղեկավարի թեկնածություն են առաջադրել ՀՀԿ, ՀՅԴ և ԲՀԿ կուսակցությունների ներկայացուցիչները, մնացյալը կպայքարեն ավագանի դառնալու համար:
Հիշեցնենք, որ 2017 թվականի նոյեմբերի 5-ին տեղական ինքնակառավարման մարմինների հերթական ընտրություններ են անցկացվելու Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի թվով 66 համայնքներում, իսկ Արարատի մարզի Արտաշատ, Լոռու մարզի Շիրակամուտ և Սյունիքի մարզի Գորիս համայնքներում անցկացվելու են արտահերթ ընտրություններ: Նշված համայնքներից 15-ում կայանալու են միայն համայնքի ղեկավարի, 17 համայնքում` միայն ավագանու անդամի, և 37 համայնքում միաժամանակ անցկացվելու են համայնքի ղեկավարի և ավագանու անդամի ընտրություններ: