21-րդ դարում բոլորը դուրս են գալիս խավարից ու կրթություն ստանում. Ռ. Մախմուդյանը՝ եզդիների կողմից 12-ամյա կրթությանը դեմ լինելու մասին (տեսանյութ)
ԱԺ «Հայաստանի Հանրապետական կուսակցություն» խմբակցության պատգամավոր, եզդիական համայնքի ներկայացուցիչ Ռուստամ Մախմուդյանը եզդական համայնքի դժգոհությունները՝ կապված 12-ամյա պարտադիր կրթության հետ, այդքան էլ արդարացված չի համարում:
Նա Tert.am-ի հետ զրույցում նշեց, թե 12-ամյա պարտադիր կրթությունը մեկ նպատակ է հետապնդում՝ ունենալ կրթված, գիտության նկատմամբ առանձնահատուկ վերաբերմունք ունեցող մատաղ սերունդ:
«Ինչ վերաբերում է այն մտահոգությունը, որը եզդիական համայնքում առկա է, որ մեզ մոտ ամուսնությունն ավելի վաղ տարիքի է, ինչով պայմանավորված դպրոց չեն հաճախում, ասեմ, որ «Հանրակրթության մասին» օրենքն ասում է, որ բացառություններ կան: ԿԳ նախարարությունն այս պահին մշակում է կարգ, որը ոչ միայն ազգային փոքրամասնություններին, այլև, օրինակ, որոշակի կրոնական խմբային անձանց կարող է վերաբերվել, որոնց համար 12-ամյա կրթությունը ընդունելի չլինի»,- ասաց նա:
Միևնույն ժամանակ Ռուստամ Մախմուդյանը շեշտեց, թե իր գնահատմամբ՝ կրթություն ստանալն ազգային առանձնահատկություններին չի հակասում: Պատգամավորի խոսքով՝ եզդիական համայնքում կա 2-րդ տեսակետը, ավելին՝ դիմել են իրեն, ասել, որ Արագածոտնի ու Արավիրի մարզում աշակերտներ կան, որոնք դպրոց չեն հաճախում ու օրենքի պահանջը չեն կատարում:
«Համայնքում 2 միմյանց հակասող կարծիք կա: Բայց իմ անձնական կարծիքն այն է, որ համայնքի շահերին դեմ գնալու որևէ միտում չկա, այն անձինք, ովքեր մտահոգություն ունեն, ասեմ՝ կարգը մշակման փուլում է, խնդիրը կլուծվի»,- ընդգծեց Ռուստամ Մախմուդյանը:
Հարցին՝ չի՞ վախենում, որ 12-ամյա կրթության սկզբունքը պաշտպանելով՝ եզդիական համայնքի կողմի քննադատության կարժանանա, պատգամավորը պատասխանեց. «Ես խորհրդարան գալու ժամանակահատվածում արդեն իսկ կոփված եմ եկել քննադատությունների ենթարկվելու: Այն քննադատությունները, որոնց կարող եմ ենթարկվել համայնքի կողմից, չի խոսի իմ կամ իրենց ճիշտ լինելու մասին, բոլորի կարծիքն ապրելու իրավունք ունի: Ես իմ օրինակով ասեմ, որ մենք ընտանիքում 3 եղբայր ու 1 քույր ենք, բոլորս էլ ունենք ոչ միայն բարձրագույն կրթություն, այլև գիտական աստիճան, որը մեզ չի խանգարել ընտանիք կազմել՝պահպանելով ազգային ավանդույթները»:
Պարտավորը գտնում է, որ 21-րդ դարում խավարից բոլորը դուրս են գալիս ու կրթություն ստանում։
Մանրամասները՝ տեսանյութում: