Անշարժ գույքի շուկան ավելի ուշ է արձագանքում, գների անկումը չի կարելի դիտարկել որպես նախաճգնաժամային ազդակ. Ֆինանսների նախարար
Ֆինանսների նախարար Վարդան Արամյանը համաձայն չէ այն դիտարկման հետ, թե անշարժ գույքի շուկայում տեղի ունեցող զարգացումները կարելի է դիտարկել որպես նախաճգնաժամային ազդակ:
Tert.am-ի հետ զրույցում Արամյանը համաձայնեց, որ սովորաբար անշարժ գույքի շուկան արձագանքում է պահանջարկին, բայց հստակեցրեց՝ ավելի շատ ուշացմամբ է արձագանքում:
Նշենք, որ Երևանում բազմաբնակարան շենքերի բնակարանների միջին գինը հասել և դեռ ավելին՝ գերազանցել է 10 տարվա նվազագույն մակարդակը:
«Այսինքն, երբ մարդկանց եկամուտները նվազում են, այնպես չէ, որ անշարժ գույքի գներն անմիջապես արձագանքում են: Օրինակ` 2008-2009թթ-ին, եթե ուշադրությամբ նայեք, թե անշարժ գույքի շուկայում ինչ կատարվեց, կնկատեք, որ 2009թ-ին, երբ մենք նույնիսկ խորը ճգնաժամ ունեցանք, 14 տոկոս անկում արձանագրվեց և հանրության եկամուտներն էապես նվազեցին, որովհետև տրանսֆերտները 30 տոկոսից ավելի նվազեցին, այնպես չէ, որ անշարժ գույքի գներն անգամներով ընկան, ժամանակի ընթացքում դա նկատվեց»,-ասաց նախարարը և մեկ այլ օրինակ բերեց, որ նույնը նկատելի էր 2013թ-ից հետո, երբ նորից տրանսֆերտները շուրջ 35 տոկոս անկում ապրեցին և ինչ-որ ժամանակ անց միայն պետք է անշարժ գույքի գները դրան արձագանքեին: «Այնպես որ, դրա մեջ որևէ վտանգավոր բան տեսնելը կամ ինչ-որ նախաճգնաժամային գնահատականներ տալն այս դեպքում ճիշտ չէ»,-ասաց նա:
Հարցին, թե այդուհանդերձ համաձայն չէ՞, որ անշարժ գույքի վիճակը լավագույնս արտահատում է ՀՀ տնտեսական վիճակը, Վարդան Արամյանը պատասխանեց, թե, իհարկե, համաձայն է, և իրենք մի քանի անգամ խոսել են այդ մասին:
«Դրա մասին մենք խոսել ենք մի քանի անգամ. իմ շուրթերից, վարչապետի շուրթերից դուք լսած կլինեք, որ 2013թ-ից այս կողմ ՀՀ-ն մտել է ավելի ցածր տնտեսական աճի գոտի։ Ինչու, որովհետև երկու տեսակի արտաքին բացասական շոկ մեր վրա ազդել է։ Ազդել է միջազգային հանքահումքային մետաղների գների կտրուկ անկումը` 3 անգամ ընկել է, ազդել է նաև ՌԴ-ի տնտեսության անկումը։ Բնականաբար, նման անկումների դեպքում մեզ մոտ պետք է տեղի ունենար պահանջարկի անկում: Դրա մասին մենք ինքներս ենք ասել։ Արդյոք պետք է արտացոլվե՞ր ինչ-որ ժամանակում անշարժ գույքի շուկայում. այո՛, անշարժ գույքի շուկայում պետք է դիտվեր պասիվություն, որովհետև հանրության եկամուտների նվազում է եղել` կախված նրանից, որ տրանսֆերտները կրճատվել են 36 տոկոսով»,-ասաց նա:
Վարդան Արամյանը նշեց, թե տնտեսական անկում և իրավիճակում հետագա խորացում թույլ չտալու համար Կառավարությունը պարտադրված եղավ հակաբյուջետային ընդլայնողականության քաղաքականություն վարել:
«Որովհետև 2-3 տարիների ընթացում տրանսֆերտները շուրջ 860 մլն դոլարի չափով կրճատվել են։ Մենք նույնչափ էլ պարտք ենք վերցրել, որպեսզի գումարները բերենք տնտեսություն և տարբեր խողովակներով ներարկենք տնտեսության մեջ։ Եթե դա չանեինք, ոչ թե կունենայինք 0,2 տոկոս տնտեսական աճ, կամ նախորդ տարի` 3, մենք երկու տարում կունենայինք ավելի խորը անկում»,-ասաց նա: