Նազարբաևի ԱՄՆ այցը 2 թիրախ ուներ՝ թուլացնել ՌԴ ազդեցությունը և ԱՄՆ-ի հետ հավասարի դիրքերից խոսել. Արման Նավասարդյան
Ղազախստանի նախագահ Նուրսուլթան Նազարբաևի այցելությունը Վաշինգտոն բավականին հաջող քաղաքական քայլ էր: Այսօր լրագրողների հետ զրույցում նման տեսակետ հայտնեց արտակարգ և լիազոր դեսպան Արման Նավասարդյանը՝ հավելելով, որ սա իսկապես հաջող քաղաքական ակցիա էր, քանի որ այն նոր թափ է հաղորդում Ղազախստան-ԱՄՆ հարաբերություններին: Նա նկատեց, որ այս հանդիպումը տնտեսապես դրական ազդեցություն կունենա Ղազախստանի վրա:
«Բացի տնտեսականից, կա նաև քաղաքական շարժառիթ, քանի որ Նազարբաևը փորձում է հնարավորիս դառնալ առաջին էշելոնի քաղաքական գործիչ: Նազարբաևի՝ ԱՄՆ կատարած այցը 2 թիրախ ունի՝ փորձում է հնարավորինս թուլացնել ՌԴ-ի ազդեցությունը Ղազախստանի վրա և փորձում է ԱՄՆ-ի հետ հավասարի դիրքերից խոսել»,- ասաց նա:
Ըստ Նավասարդյանի՝ Ղազախստանի նախագահը ցանկանում է Մոսկվայի և Վաշինգտոնի համար միջնորդ լինել, ինչպես նաև կապել ԱՄՆ-ն ՌԴ, ու ԱՄՆ-ն ու Չինաստանը:
«Ժամանակին Նազարբաևը հրաժարվեց միջուկային զենք ունենալու գաղափարից, հիմա ասում է՝ տեսեք, ես ինչ լավն եմ, դուք էլ այս ճանապարհով գնացեք»,- շարունակեց Արման Նավասարդյանը:
Հիշեցնենք, որ հունվարի 17-ին Սպիտակ տանը հանդիպել են ԱՄՆ-ի և Ղազախստանի նախագահները: