Իսրայելցի հնագետները 1800-ամյա հռոմեական գունագեղ խճանկար են հայտնաբերել
Իսրայելցի հնագետները Կեյսարի ազգային պարկում հռոմեական ժամանակաշրջանին պատկանող հնագույն խճանկար են հայտնաբերել, որի տարիքը գնահատվում է 1800 տարի: Այս մասին հաղորդում է РИА Новости-ն՝ վկայակոչելով Իսրայելի հնությունների վարչության հաղորդագրությունը:
Գունավոր խճանկարը հայտնաբերվել է առավել ուշ շրջանում կառուցված շինության՝ 1500 տարվա մեծ տան ավերակների տակ, որը ենթադրվում է, որ առևտրի հանրային տարածքի մի մաս է կազմել:
Ինչպես նշվում է, գտածոն բարձրորակ նմուշ է 3.5-ը 8 մետրի վրա մակերեսով: Խճանկարի վրա պատկերված են տարբեր չափսերի գունագեղ նախշազարդեր և երկար գրություն հունարենով:
Մասնագետների խոսքով՝ խճանկարում երեք տղամարդ է պատկերված տոգայով (հին հռոմեական վերնազգեստ): Նրանք, հավանաբար, արիստոկրատ դասի ներկայացուցիչներ էին: