Քենիայում շուրջ 800 000 մարդ է տուժել ջրհեղեղի պատճառով
Քենիայում հորդառատ անձրևներով պայմանավորված ջրհեղեղի պատճառով շուրջ 800 000 մարդ է տուժել: РИА Новости-ի փոխանցմամբ՝ այս մասին հինգշաբթի հայտնել են ՄԱԿ-ի հումանիտար հարցերով գերագույն հանձնակատարի վարչութունից:
Կազմակերպության տվյալներով՝ ջրհեղեղների պատճառով երկրում արդեն 186 մարդ է մահացել, 100-ը վնասվածքներ են ստացել: Առնվազն 300 000 մարդ ստիպված է եղել լքել իրենց տները:
ՄԱԿ-ում մտավախություն ունեն, որ ջրհեղեղների պատճառով կարող է մեծանալ վտանգավոր հիվանդությունների տարածման վտանգը Քենիայի 17 առավել տուժած շրջանում, որտեղ վատ սանիտարական պայմաններ են առկա: Բացի այդ, այդ շրջաններում մաքուր ջրի պակաս է զգացվում:
ՄԱԿ-ի մանկական հիմնադրամում՝ ՅՈւՆԻՍԵՖ-ում, նշում են, որ միայն անցյալ շաբաթվա ընթացքում Քենիայում խոլերայով հիվանդանալու 261 դեպք է գրանցվել: Արևելյան նահանգներում ջրհեղեղի պատճառով մեծանում է մալարիայի տարածման վտանգը: