Մի շարք կառույցների տրվել է հանրապետական նշանակության հուշարձանի կարգավիճակ. քննարկում
Մշակույթի նախարարության Պատմության ու մշակույթի հուշարձանների պահպանության գործակալության պետ Արմեն Աբրոյանը և ՀՀ վաստակավոր ճարտարապետ Արտակ Ղուլյանն այսօր մամուլի ասուլիսին հայտնեցին, որ մի շարք կառույցների՝ «Զվարթնոց» օդանավակայանին, «Ռոսիա» կինոթատրոնին, Կասկադին, մետրոպոլիտենի երկու՝ «Հանրապետության հրապարակ» և «Երիտասարդական» կայարաններին, «Մոսկվա» կինոթատրոնի ամառային կինոդահլիճին, «Հրազդան» մարզադահլիճին տրվել է հանրապետական նշանակության հուշարձանի կարգավիճակ:
Արմեն Աբրոյանն ասաց, որ կառույցների նախկին տեսքը վերադարձնելու հարցը երկրորդ խնդիրն է և մասնակիորեն է առնչվում կարգավիճակին: «Օրենսդրությունն ասում է, որ հուշարձանի ձևափոխումը միայն թույլատրելի է ի նպաստ հուշարձանի, իսկ հուշարձանի քանդում ընդհանրապես արգելվում է»,-ասաց նա:
Ինչ վերաբերում է Հանրապետության հրապարակի մետրոյի հարակից տարածքում տեղադրված Արամ Մանուկյանի արձանին, ապա նա ասաց, որ այն դեռևս կարգավիճակ չունեցող կառույցի վրա է տեղադրվել: «Արձանը տեղադրվել է առանց Մշակույթի նախարարության համաձայնության, և իմ անձնական դիրքորոշումն այն է, որ կարելի է և ենթակա է այն տեղափոխման, իսկ տեղը քննարկելի է»,-ասաց նա և նշեց, որ չի կարող ասել, թե ինչու մշակույթի նախարարը չի եղել արձանի բացմանը և ենթադրում է, որ դրա համար հատուկ պատճառ կա:
Արտակ Ղուլյանը նշեց, որ հուշարձանի կարգավիճակ տալու անհրաժեշտությունը չի առաջանա, եթե կառուցապատմանը գրագետ մոտեցում ցուցաբերվի, քանի որ հուշարձանները, հանրության կողմից սիրված ճանաչված շենքեր են և քաղաքաստեղծ գործոն են:
«Կարևորը՝ այդ շենքերը լինեն անխաթար,-ասաց նա,-այսօրվա Երևանի կառուցապատումը բազմաոճության, բազմատարրության քաոսային մի միջավայր է, որը կարծես կանոնակարգից դուրս է»,-ասաց նա և նշեց, որ իշխանությունը պետք է հետևի, որ օրենքը պահպանվի:
Անդրադառնալով «Հին Երևան» ծրագրին՝ նա նշեց, որ այնտեղ ևս ակտիվ նոր միջամտություն է կատարվում, որոնք արժեզրկում են կառույցները: Ըստ նրա՝ պետք էր ավել զգույշ լինել: