Ռուսաստանում կինը դատի է տվել բժիշկներին, որոնք 2 տարի առաջ վիրահատության ժամանակ իր մարմնում ասեղ են մոռացել
Ռուսաստանի Դաշնության կազմի մեջ մտնող Բաշկորտոստանի Հանրապետության Ուչալի քաղաքի բնակչուհին դատի է տվել երկու տարի առաջ իրեն վիրահատած բժիշկներին, որոնք վիրահատության ընթացքում կնոջ մարմնում ասեղ են թողել։
Ինչպես գրում է gazeta.ru-ն՝ հղում անելով Բաշկորտոստանի գերագույն դատարանին, կինը պահանջել է 500.000 ռուբլու չափով բարոյական փոխհատուցում՝ նշելով, որ վիրահատության ժամանակ իր մարմնում մոռացված ասեղը բարոյական ու ֆիզիկական տանջանքների է ենթարկել իրեն։
Կինը վիրահատվել է 2016 թվականին, դրանից հետո նա պարբերաբար ցավեր է ունեցել որովայնի ու գոտկատեղի հատվածում։ Հիվանդը պարբերաբար դիմել է բժիշկներին, որոնք, սակայն, այդպես էլ չեն կարողացել հստակեցնել ցավերի պատճառը։
Նշվում է, որ մարմնում մնացած ասեղը հայտնաբերվել է պատահաբար, երբ կինը մագնիսառեզոնանսային տոմոգրաֆիայի է ուղարկվել՝ ախտորոշման հաստատման համար։ Այդ ժամանակ ստուգման սարքն արձագանքել է հիվանդի մարմնում առկա օտար մետաղին ու անջատվել։