Աջափնյակում ԲՀԿ-ի շտաբը փակ էր, ոստիկաններն ու ԲՀԿ-ականները գնացել էին շտաբից (լուսանկարներ)
Աջափնյակում ԲՀԿ շտաբը, որտեղից այսօր ոստիկանություն էր հրավիրվել երեք անձ, ժամը 23:30-ի դրությամբ արդեն փակ էր:
Շտաբի ներսում գտնվող քաղաքացին Tert.am-ի թղթակցին հայտնեց, որ նշված ժամից մոտ մեկ ժամ առաջ ԲՀԿ խմբակցության անդամներն ու ԲՀԿ-ի ցուցակով ավագանու թեկնածուները հեռացել են շտաբի տարածքից:
Հարցին, թե այդ ժամին են հեռացել նաև ոստիկանության ծառայողները, շենքի ներսում գտնվող քաղաքացին ասաց. «Այո, մոտավորապես: Պարզապես դուռը չի փակվում, ապակին ամբողջովին կոտրվել է, ես մնացել եմ այստեղ»:
Նշենք, որ ԲՀԿ շտաբից ԱԺ «Ծառուկյան» խմբակցության պատգամավորները ուղիղ հեռարձակման միջոցով պարբերաբար տեղեկացնում էին, որ Աջափնյակի իրենց գրասենյակից քաղաքացիներ են տարվել ոստիկանություն, բացի այդ ոստիկանության ծառայողները շրջափակել են շտաբը և շարունակում են խուզարկություններ իրականացնել:
ԲՀԿ քաղաքապետի թեկնածու Նաիրա Զոհրաբյանն էլ հայտնել էր, որ սուտ մատնություն են տվել, թե ԲՀԿ շտաբում կաշառք է բաժանվում, երեք հոգի ոստիկանությունում է:
Ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանը Tert.am-ի հարցին, թե ինչի հիման վրա են քաղաքացիները հրավիրվել ոստիկանություն, հայտնել էր« որ նախ սոցիալական ցանցերում է հրապարակում եղել, և բացի այդ ահազանգ է եղել, և դրանց հիման վրա քաղաքացիները հրավիրվել են ոստիկանություն։ Կատարվում են համապատասխան ստուգումներ և դատավարական գործողություններ: