Մինչև Խաչատուրովին հետ կանչելը պետք էր նախապատրաստվել. եթե ՀԱՊԿ-ում պրոբլեմներ լինեն, առաջին օգտվողը Ադրբեջանն է լինելու. Արմեն Ռուստամյան
Միանշանակ է, որ թե՛ Բելառուսի, թե՛ Ղազախստանի ղեկավարների հայտարարությունները չեն բխում կառուցողական ոգուց և համագործակցության տրամաբանությունից, որ ՀԱՊԿ գործընկերության մեջ առկա է. ԱԺ ճեպազրույցների ժամին ասաց ՀՅԴ խմբակցության ղեկավար Արմեն Ռուստամյանը:
Ըստ նրա՝ զգայուն հարցերը մինչև չեն համաձայնեցվում ներսում, չեն հրապարակվում: «Սրանով, չեմ կարծում, որ օգնում են հետագա համագործակցության ձեռք բերմանը: Նման հարցերը լուծվելու են համախոհությամբ, և դրա հնարավորությունը պետք է պահպանվի: Մյուս կողմից էլ մեր խնդիրները մենք այնպես պետք է ձևակերպենք, որ լրացուցիչ խնդիրներ չառաջացնեն»,-ասաց նա:
Ռուստամյանը, խոսելով ՀՀ-ի՝ ՀԱՊԿ գլխավոր քարտուղարի տեղը պահելու ցանկությունից, նկատեց, որ մինչ այդ պետք է հասկանային, որ կար բաց կանոնադրության մեջ: «Մինչև Խաչատուրովին հետ կանչելը պետք էր նախապատրաստվել, որը չենք արել, ոչ թե փաստից հետո փորձել խնդիրները լուծել»,-շեշտեց նա:
ՀՅԴ պատգամավորն ասաց, որ ՀՀ-ն չունի այդքան լծակ՝ մյուս երկրների ղեկավարներից պահանջելու կեցվածք պահպանել: «Այդ տրամաբանությամբ, եթե խոսենք, կառուցողական տեղ չի տանելու: Կրքերը բորբոքում են, լարվածությունը մեծանում է, ՀԱՊԿ-ում, եթե պրոբլեմներ լինեն, առաջին օգտվողը Ադրբեջանն է լինելու: Տեսնում եմ՝ Ադրբեջանի նախագահը ինչպիսի հրճվանք է ապրում՝ մեղադրանքի սլաքը ուղղելով ՀՀ-ի վրա, որ եթե խնդիր կա այդ կազմակերպության մեջ, ուրեմն ՀՀ-ից է»,-նշեց նա:
ՀՅԴ խմբակցության ղեկավարն ընդգծեց, որ ՀՀ-ն այնքան հմուտ պետք է լինի, որ ՀԱՊԿ-ի նշանակությունը չանտեսվի: Բացի այս, ըստ նրա, մեր գոյությունն էլ այդ կառույցում հարվածի տակ դնելը սխալ ճանապարհ կլինի:
Ըստ Ռուստամյանի՝ պետք է խուսափել այնպիսի ձևակերպումներից, ինչպիսիք են հին «դիկտատորներ», որքան էլ մեր ներսում այլ մտածելակերպ լինի:
Հիշեցնենք, որ Յուրի Խաչատուրովն ազատվել է Հավաքական անվտանգության պայմանագրի կազմակերպության գլխավոր քարտուղարի պաշտոնից: ՀԱՊԿ գլխավոր քարտուղարի պարտականությունների կատարումը դրվել է կազմակերպության գլխավոր քարտուղարի տեղակալ Վալերի Սեմերիկովի վրա: