Հունաստանը 1000 զինծառայող և 400 ոստիկան է ուղարկում Թուրքիայի հետ սահմանի մոտ
Հունաստանը ևս 1000 զինծառայող, 400 ոստիկան և զրահատեխնիկա է ուղարկում Թուրքիայի հետ սահմանային անցակետի մոտ՝ կանխելու համար սահմանի մոտ հավաքված հազարավոր անօրինական ներգաղթյալների՝ երկիր մուտք գործելու փորձը:
Ինչպես հայտնում է ТАСС գործակալությունը՝ հղում անելով հունական աղբյուրին, նման որոշում են կայացրել Հունաստանի ազգային պաշտպանության գլխավոր հրամանատարությունը և քաղաքացիների պաշտպանության հարցերով նախարարությունը, որին ենթարկվում է ոստիկանությունը:
Պարբերականի տվյալներով՝ հունական զինուժը տեղակայվում է երկրի հյուսիս-արևելքում՝ կապված թուրք-հունական սահմանին ստեղծված լարված իրավիճակի հետ, որն ի հայտ է եկել Անկարայի որոշման ֆոնին՝ չխոչընդոտելու ներգաղթյալներին անցնել Հունաստանի տարածք:
Նշվում է, որ սահմանային հատվածում է գտնվում Հունաստանի ազգային պաշտպանության գլխավոր հրամանատարության ղեկավար Կոնստանտինոս Ֆլորոսը:
Հիշեցնենք, որ ավելի վաղ ստացված հաղորդման համաձայն՝ Թուրքիան բացել է ԵՄ-ի հետ իր սահմանները սիրիացի ներգաղթյալների համար: