ՆԱՍԱ-ն կանխատեսել է, որ տիեզերագնացները մինչև 2030-ի վերջն արդեն կապրեն և կաշխատեն Լուսնի վրա
Ըստ ԱՄՆ-ի ազգային ավիատիեզերական գործակալության՝ ՆԱՍԱ-ի պաշտոնյայի, տիեզերագնացները մինչև ընթացիկ տասնամյակի վերջն արդեն կապրեն և կաշխատեն Լուսնի վրա, գրում է The Guardian-ը:
ՆԱՍԱ-ի «Օրիոն» լուսնային տիեզերանավերի ծրագրի ղեկավար Հովարդ Հուն նշել է, որ մինչև 2030 թվականի ավարտը մարդիկ կարող են ակտիվ լինել Լուսնի վրա՝ ունենալով ապրելու միջավայր և իրենց գործունեությանն աջակցելու համար նախատեսված լուսնագնացներ:
«Իհարկե, այս տասնամյակում մենք կունենանք Լուսնի վրա տևական ժամանակահատված ապրող մարդիկ... Նրանք կունենան բնակավայրեր, նրանք կունենան լուսնագնացներ: Նրանք ապրելու են Լուսնի մակերեսի վրա և գիտությամբ են զբաղվելու», - ասել է մասնագետը BBC-ի եթերում:
Հիշեցնենք, որ ՆԱՍԱ-ն նոյեմբերի 16-ի առավոտյան, գերծանր հրթիռով (Space Launch System) դեպի Լուսին է արձակել «Օրիոն» տիեզերանավը:
SLS գերծանր հրթիռի և «Օրիոն» տիեզերանավի արձակումն «Արտեմիս 1» առաքելության մի փուլն է: Տիեզերանավը պետք է թռնի դեպի Լուսին փորձնական անօդաչու ռեժիմով, մի քանի շաբաթ անցկացնի Լուսնի ուղեծրում և վերադառնա Երկիր: Իսկ ահա 2024 թվականին նախատեսվում է «Արտեմիս 2» առաքելությունը, որի ընթացքում չորս տիեզերագնացներ կթռնեն Լուսնի շուրջը։ «Արտեմիս 3» առաքելությունը նախատեսված է 2025 թվականին, որի ընթացքում տիեզերագնացները պետք է վայրէջք կատարեն Լուսնի մակերեսին։