Չինաստանը Իսրայելին և Թուրքիային կոչ է արել դադարեցնել հարձակումները Սիրիայի վրա
Չինաստանը կոչ է անում Թուրքիային և Իսրայելին անհապաղ դադարեցնել հարձակումները Սիրիայի վրա, հայտարարել է ՄԱԿ-ում Չինաստանի ներկայացուցչի տեղակալ Գեն Շուանգը։
«Մենք պետք է խստորեն պաշտպանենք Սիրիայի ինքնիշխանությունն ու տարածքային ամբողջականությունը: Սիրիայում անվտանգային իրավիճակը շարունակում է մնալ անկայուն: Թուրքիան օդային հարվածներ է հասցրել Սիրիային և հայտարարել, որ ցամաքային գործողություն է իրականացնելու Սիրիայի դեմ: Իսրայելի օդային հարվածները նույնպես շարունակվել են Սիրիայի դեմ»,- ասել է Գենգ Շուանգը:
Նրա խոսքով՝ այս բոլոր գործողությունները կոպտորեն խախտում են Սիրիայի ինքնիշխանությունն ու տարածքային ամբողջականությունը և կարող են հանգեցնել սիրիական հակամարտության սրման ու տարածման։
«Չինաստանը հայտնում է իր խորը մտահոգությունը։ Մենք կոչ ենք անում Թուրքիային և Իսրայելին անհապաղ դադարեցնել անդրսահմանային հարձակումները, խուսափել ցանկացած գործողությունից, որը կարող է սրել իրավիճակը և շարունակել երկխոսությունը՝ համապատասխան խնդիրները լուծելու համար», - ընդգծել է նա։