ՌԴ կործանիչները Բալթիկ ծովի վրա ուղեկցել են ԱՄՆ-ի ռմբակոծիչներին. ՌԴ ՊՆ
Ռուսաստանի Դաշնության Սու-35 և Սու-27 կործանիչները Բալթիկ ծովի վրա ուղեկցել են դեպի ՌԴ սահման թռչող ԱՄՆ ռազմաօդայի ուժերի2 B-1B ռազմավարական ռմբակոծիչներին։ Այս մասին հայտնել է ՌԴ պաշտպանության նախարարության մամուլի ծառայությունը:
Ռադիոտեղորոշիչ կայանները հայտնաբերել են պետական սահմանին մոտեցող 2 օդային թիրախ, և սահմանային խախտում թույլ չտալու համար օդ են բարձրացվել ՌԴ ՊՆ արևմտյան ռազմական օկրուգի ՀՕՊ հերթապահ ուժերի կազմում ընդգրկված Սու-35Ս և Սու-27Պ կործանիչները։
«Ռուսական կործանիչների անձնակազմն օդային թիրախները դասակարգել է որպես ԱՄՆ ՌՕՈՒ-ի B-1B ռազմավարական ռմբակոծիչներ։ Օտարերկրյա ռազմական ինքնաթիռները Ռուսաստանի Դաշնության պետական սահմանից հեռացնելուց հետո ռուսական կործանիչները վերադարձել են բազավորման օդանավակայան»,- ասվում է հաղորդագրության մեջ։
Համաձայն հաղորդագրության՝ կործանիչները թույլ չեն տվել, որ ամերիկյանինքնաթիռները խախտեն ՌԴ սահմանը։