Միջազգային հետախուզում է հայտարարվել ոստիկանության նախկին աշխատակից Վարդան Ղուկասյանի նկատմամբ
Հայաստանի իրավապահները դիմելու են Միացյալ Նահանգներին՝ «Դոգ» մականունով հայտնի Վարդան Ղուկասյանին արտահանձնելու խնդրանքով։
Հաղորդվում է, որ ոստիկանությունը միջազգային հետախուզում է հայտարարել իր հայհոյախառն եթերներով հայտնի Ղուկասյանի նկատմամբ։ Նա նաև Հայաստանում բացված «Հանրային ձայն» կուսակցության նախագահն է։
Քննչական կոմիտեն ոստիկանության նախկին աշխատակցին մեղադրում է շորթման, դատարանի նկատմամբ անհարգալից վերաբերմունքի, տարբեր մարդկանց նկատմամբ բռնություն գործադրելու հրապարակային կոչերի համար։
Ղուկասյանը երեկ ուղիղ եթերում արդեն հերքել է մեղադրանքը. - «Իմ հեղինակության հետ խաղում են ոնց ուզում են, ոնց կարում են... էլ շորթումով, Տիգրան Արզաքանցյանով և այլն։ Հիմքում դրված է երկու ռուսական հեռախոսահամար, որ իմ ձեռքի տակ չեն, իմը չեն, իմ հետ կապ չունեն, էդ հեռախոսահամարներով դրել են ու ամբողջ հանրությանը մեղմ ասած ապակողմնորոշում են»։
Իրավապահները հայտարարում են, որ «Հանրային ձայն» կուսակցության նախագահը գործարար Տիգրան Արզաքանցյանից 110 հազար դոլար է պահանջել, հակառակ դեպքում սպառնացել է, որ նրա և նրա կնոջ վերաբերյալ իր հաղորդաշարով կհրապարակի նրանց համբավն արատավոր տեղեկություններ։ Արզաքանցյանը գումարը չի տվել, փոխարենը դիմել է իրավապահներին։
Ըստ քննչականի, Ղուկասյանը նաև երևանյան գիշերային ակումբներից մեկի ներկայացուցչից է պահանջել 60-100 հազար դոլար ակումբի մասին հրապարակումները դադարեցնելու դիմաց։ Բայց սա ամենը չէ. քրեական գործերով են անցնում նաև Ղուկասյանի կուսակիցներն ու մտերիմները, որոնք ևս գումար շորթելու համար են մեղադրվում։
Ընդհանրապես, տարբեր հանրային գործիչների մասին ոչ նորմատիվ բառապաշարով տեղեկություններ հրապարակելը Վարդան Ղուկասյանի ոճն է, նա արդեն մի քանի տարի է հենց նման ուղիղ եթերներով բազմահազարանոց լսարան է հավաքել։ Երբեմն նրա սոցցանցերի էջերը բողոքներից հետո փակվում են, բայց նա շարունակում է նորերը բացել։
Դատարանը Ղուկասյանին կալանավորելու որոշում է կայացրել։ Ըստ Քննչականի՝ դիմելու են Ինտերպոլին, որ նրան Միացյալ Նահանգներից Հայաստան տեղափոխեն։
Ղուկասյանի փաստաբան Լևոն Բաղդասարյանն ընդգծում է՝ արդարադատության շահը պահանջում է օբյետիվ քննություն. - «Ընդհանրապես մրցակցություն չկա քննչական և պաշտպանական կողմի միջև, և արձանագրում եմ ակնհայտ խախտումներ»։
Մինչ փաստաբանը հերքում է, թե իր պաշտպանյալը Արզաքանցյանից գումար է պահանջել, իրավապահները երկուսի նամակագրությունն են հրապարակել, որտեղ գումարի պահանջի մասին խոսակցություն կա։
Ղուկասյանն արդեն հայտարարել է, որ այդ հեռախոսահամարներն իրենը չեն՝ ասում է փաստաբանը։ Ավելին, Ղուկասյանը քննիչների փոխարեն հենց ինքն է պարզել այդ հեռախոսահամարների տերերին։
«Գրագրությունը եղել է 2023 թվականի կարծես փետրվար ամսին։ Ընդամենը մեկհարցանի խնդիր ա, որպեսզի կարողանա ճշտի՝ 2023 թվականի փետրվարին էդ գրագրությունը ո՞ր երկրից ա կատարվել։ Նաև հեռախոսահամարների աղբյուրը ճշտեր։ Ավելին ասեմ, Վարդան Ղուկասյանը մեր Քննչական կոմիտեին գրություն էր ուղարկել, տվել է, թե էդ հեռախոսահամարի տերերը ովքեր են, որտեղ են գտնվում, նաև իրենց հասցեները», - նշեց փաստաբանը։
Ոստիկանություն դիմած Տիգրան Արզաքանցյանի հետ կապ հաստատել մեզ չի հաջողվել։ Ավելի վաղ նա հաստատել էր, որ շանտաժի է ենթարկվել Ղուկասյանի կողմից։
Մինչ Վարդան Ղուկասյանը պնդում է, որ հանցանք չի գործել, իսկ Քննչականն ու Արզաքանցյանը հակառակի մասին խոսում, մեդիա ոլորտի մասնագետները այլ խնդիր են բարձրացնում։ Ինչպես ստացվեց, որ ծայրահեղ անպարկեշտ բառապաշարով խոսող ու ուղիղ եթերում անընդհատ հայհոյող մարդը հարյուր հազարավոր հետևորդներ ձեռք բերեց։
Ղուկասյանը «լցրել» է այն բացը, որը ստեղծվել է մեդիայի նկատմամբ հանրության վստահության պակասի պատճառով. Գեղամ Վարդանյան
«Մարդը կարողանում է լինել համոզիչ, մարդը կարողանում է իր լսարանին տալ էն, ինչը որ կապում է նրան լսարանին։ Այսինքն՝ մարդը տալիս է նորություն, մարդը տալիս է կարծիք, մարդը տալիս է լուծում, օգտակարություն... ռուբինհուդյան բան կա, չէ՞՝ էս հարցը լուծեմ...», - ասում է Մեդիա նախաձեռնությունների կենտրոնի media.am կայքի խմբագիր Գեղամ Վարդանյանը։
Նրա խոսքով, Ղուկասյանը «լցրել» է այն բացը, որը ստեղծվել է մեդիայի նկատմամբ հանրության վստահության պակասի պատճառով. - «Կառավարության հաղորդակցության ճգնաժամ էր և է, և մարդը էդ բաց տեղը լցրել է։ Որ ասում են՝ ապատեղեկատվություն է տարածվում, սուտ է տարածվում, էդ հենց իզուր տեղը չի տարածվում։ Բոլոր էն դեպքերում, երբ որ կառավարությունը, իշխանությունը, տեղական իշխանությունը փախողում է հաղորդակցությունը, էդ ձախողված հաղորդակցությունը նպաստում է ուղիղ ձևով ապատեղեկատվության տարածմանը»։
Այս ճգնաժամային պայմաններում է Ղուկասյանը կարողացել հավաքել իր լսարանը։ Եվ խնդիրը հենց այդ բացասական ազդեցությունն է, ասում է Վարդանյանը, որի չեզոքացման ուղղությամբ պետք է աշխատի իշխանությունը. - «Իրեն կարող են կոչել բլոգեր, կարող են կոչել վլոգեր, ազդեցիկ մարդ... բայց ինչպես է, ըստ կանխավարկածի, կամ վարկածի, այդ լսարանը օգտագործել ոչ թե հասարակության ինֆորմացիա տալու, կարծիքներ տալու և օգնելու, այլ մոլորեցնելու և որոշակի մարդկանց մասին ոչ ճիշտ, ոչ մինչև վերջ ճշտված լուրեր տարածելու, կամ վնասելու, կամ շանտաժ անելով գումար աշխատելու»։
Գուցե լրագրողներն ու լրատվամիջոցները բավարար չափով ուժեղ չէին, որ դատարկ այդ տեղը լցվեց, կրթական համակարգը բավարար չափով ուժեղ չէր, որ մարդիկ չհավատային ապատեղեկատվությանը, իշխանությունների հաղորդակցությունը բավարար չափով ուժեղ չէր այդ ստերը չտարածելու համար, և թիրախավորված մարդիկ բավականաչափ քաջ չէին դիմակայելու, ասում է մեդիա մասնագետն ու ընդգծում՝ նման բովանդակությամբ մեդիա արտադրանքից ազատվելու համար լրատվամիջոցներն ավելի վստահելի պետք է դառնան, անելիք ունի նաև կրթական համակարգը։