Հենրի Քիսինջերը՝ 100 տարեկան
Արդիական քաղաքական ասպարեզի ամենափորձառու գործիչներից մեկը, ԱՄՆ դիվանագիտության վետերան, նախկին պետական քարտուղար, ազգային անվտանգության հարցերով նախկին խորհրդական Հենրի Քիսինջերը մայիսի 27-ին նշեց ծննդյան 100-ամյակը:
Նա ԱՄՆ պատմության ընթացքում միակն է, ով միաժամանակ զբաղեցրել է այդ երկու պաշտոնները:
Նա ծնվել է հրեաների ընտանիքում 1923 թվականի մայիսի 27-ին Վայմարյան հանրապետության (ներկայիս Գերմանիա) Բավարիայի երկրամասի Ֆյուրտ ավանում:
Նացիստների քաղաքականությունից սարսափած ընտանիքը կարողացել է 1938 թվականին տեղափոխվել ԱՄՆ:
Գերմանիայում մնացած նրա բոլոր ազգականները Հրեից ողջակիզման՝ Հոլոքոստի տարիներին սպանվել են:
Երկրորդ աշխարհամարտի տարիներին ծառայել է ամերիկյան բանակում, այդ թվում Գերմանիայում՝ որպես ռազմական հետախուզության թարգմանիչ գերմաներենից: 1945 թվականին Հեսսենի երկրամասում նշանակվել է դենացիֆիկացիայի հարցով պատասխանատու սպա: Արժանացել է Բրոնզե մեդալին:
Պատերազմից հետո ԱՄՆ-ում ավարտել է Հարվարդի համալսարանը: 1950-ականների երկրորդ կեսից սկսել է աշխատել քաղաքական տարբեր կառույցներում որպես անվտանգության հարցերով փորձագետ:
Ռիչարդ Նիքսոնի նախագահության օրոք 1969-1974 թվականներին նշանակվել է ազգային անվտանգության հարցերով խորհրդական և պետական քարտուղար: Այդ երկրորդ պաշտոնում մինչև 1977 թվականը շարունակել է աշխատաքը Ջերալդ Ֆորդի նախագահության օրոք:
Նոբելյան Խաղաղության մրցանակի դափնեկիր է: Պետական պաշտոններից հեռանալուց հետո դասավանդել է, հեղինակել է բազում աշխատություններ և գրքեր, տարբեր քաղաքական գիտահետազոտական հաստատություններում աշխատել է որպես խորհրդատու:
Խորհրդային Միության և հետագայում՝ Ռուսաստանի հետ հարաբերությունների հարցում համարվել է «համարժեք գործնական կապերի և անհրաժեշտության պարագայում վճռական զսպման կողմնակից»:
2007 թվականին մի խումբ այլ վետերան դիվանագետների հետ Կոնգրեսին դիմել է Հայոց ցեղասպանությունը չճանաչելու հորդորով:
Ուկրաինայի հարցում 2022 թվականին առաջարկել է «վիճելի տարածքներում անցկացնել հանրաքվե՝ միջազգային հսկողության ներքո», հորդորել է Կիևին որոշ զիջումների գնալ, ինչի համար նախագահ Վլադիմիր Զելենկու կողմից ենթարկվել է սուր քննադատության: