Եգիպտոսը դիմել է ԲՐԻԿՍ-ին միանալու համար
Կահիրեում Ռուսաստանի դեսպան Գեորգի Բորիսենկոն հաստատել է, որ Եգիպտոսը դիմել է ԲՐԻԿՍ-ին BRICS (Բրազիլիա, Ռուսաստան, Հնդկաստան, Չինաստան, Հարավային Աֆրիկա) միանալու համար, հայտնում է ՏԱՍՍ-ը։
«Եգիպտոսը հայտ է ներկայացրել ԲՐԻԿՍ խմբին միանալու համար, քանի որ նախաձեռնություններից մեկը, որով ներկայումս զբաղվում է ԲՐԻԿՍ-ը, առևտրի առավելագույն անցումն է այլընտրանքային արժույթների, լինի դա ազգային, թե ինչ-որ միասնական արժույթի ստեղծում: Եգիպտոսը շատ շահագրգռված է դրանում»,- ՏԱՍՍ-ի հետ զրույցում ասել է դիվանագետը։
Հունիսի 2-ին Քեյփթաունում կայացել է ԲՐԻԿՍ-ի արտգործնախարարների հանդիպումը։ Դրան մասնակցել են նաև Գլոբալ հարավի 12 պետությունների արտգործնախարարները, որոնք ցանկություն են հայտնել միանալ ասոցիացիային։ Դրանք են՝ Արգենտինան, Բանգլադեշը, Վենեսուելան, Գաբոնը, Կոնգոյի Դեմոկրատական Հանրապետությունը, Եգիպտոսը, Ինդոնեզիան, Իրանը, Կոմորների միությունը, Կուբան, ԱՄԷ-ն և Սաուդյան Արաբիան։