Եկել եք այստեղ, որ ի՞նչ անեք. ՔՊ-ական պատգամավորները՝ ՄՊՀ անդամի թեկնածուին (տեսանյութ)
Դուք եկել եք այստեղ, որ ի՞նչ անեք։ Այս հարցով այսօր ԱԺ-ում ՔՊ-ական մի շարք պատգամավորներ դիմեցին Մրցակցության պաշտպանության հանձնաժողովի անդամի թեկնածու Անահիտ Սարգսյանին՝ մեջբերելով նրա ֆեյսբուքյան գրառումը, որտեղ Սարգսյանը «Քաղաքացիական պայմանագիր» կուսակցությանն ընտրած քաղաքացիներին «ոչխար» է անվանել։
Պատգամավորների հարցերին, թե որքանով է բարոյական այդ քաղաքացիների կողմից ընտրված պատգամավորների՝ իրեն հանձնաժողովի անդամ ընտրելը, Անահիտ Սարգսյանը պատասխանեց, որ նման գրառում չի եղել իր ֆեյսբուքյան էջում, և, ինչպես ինքն է կարծում, Ազգային ժողովում պետք է քննարկվեն պետության համար կարևոր հարցեր, ոչ թե ֆիզիկական անձանց ֆեյսբուքյան գրառումներ:
«Օրենքի պահանջն է՝ հանձնաժողովը բաղկացած է յոթ անդամից, որից երկուսն ընդիմության քվոտան է, ես ներկայացել եմ որպես ընդդիմության քվոտայով ներկայացուցիչ: Ես ներկայացրի իմ կենսագրությունը, իմ մասնագիտական կարողությունները, իսկ որքանով ինձ կընտրի Ազգային Ժողովը, դա արդեն իրենց սեփական հայեցողությունն է: Ես գտնում եմ, որ Ազգային ժողովը պետք է առաջնորդվի օրենքով և սեփական խղճով: Եթե դուք գտնում եք, որ ես համապատասխան չեմ, կարող եք չընտրել»: