Իսրայելը ներխուժել է պաղեստինցիների Ջենին ճամբար. ինչու՞ է ընտրվել Ջենինը
Վերջին օրերին իսրայելական բանակը լայնածավալ ներխուժում էր իրականացրել Արևմտյան ափի Ջենին փախստականների ճամբար, որի հետևանքով սպանվել էր 6 պաղեստինցի, վիրավորվել՝ 91-ը:
Ներխուժումը վերջին տարիներին ամենամեծն էր և մի քանի առումներով տարբերվում էր նախորդներից:
Ի՞նչու էր ընտրվել Ջենինը:
Ինչպես գրում է Aljazeera-ն, Ջենին փախստականների ճամբարն ի սկզբանե ստեղծվել է 1953 թվականին: Արաբա-իսրայելական, ինչպես նաև 6-օրյա պատերազմների հետևանքով շուրջ 750 հազար պաղեստինցիներ ստիպված եղան լքել իրենց բնակավայրերը: Արդյունքում ստեղծվեց Ջենին ճամբարը, որը հարձակման ենթարկվեց նաև 2002 թվականին՝ պաղեստինյան երկրորդ Ինթիֆադայի ժամանակ:
Ըստ Human Rights Watch-ի (HRW) հետաքննության՝ այդ շրջանում սպանվել է շուրջ 52 պաղեստինցի՝ այդ թվում կանայք և երեխաներ:
Իսրայելի զինված ուժերը վերջերս դարձյալ ակտիվացրել են հարձակումները Ջենինի վրա, քանի որ վերջինս 2021 թվականից հետո Գազայի հետ մեկտեղ դարձել է պաղեստինյան դիմադրության հիմնական խորհրդանիշը:
Իսրայելին անհանգստացնում է այն հանգամանքը, որ Ջենինում ավելի մեծ թվով երիտասարդ պաղեստինցիներ են կարողանում զենք ձեռք բերել: Բացի այդ, ճամբարում տեղակայված են մի քանի խմբավորումների զինված մարտիկներ, ինչը նշանակում է, որ Իսրայելը Ջենինը դիտարկում է «ահաբեկչական» գործունեության կենտրոն:
The post Իսրայելը ներխուժել է պաղեստինցիների Ջենին ճամբար. ինչու՞ է ընտրվել Ջենինը appeared first on ԳԱԼԱ.