Գլոբալ պրոցեսի ընթացքում հակառակորդ կողմը փորձում է ճնշումներ գործադրել մեր նկատմամբ․ Ալեն Սիմոնյանը՝ ադրբեջանական սադրանքի մասին
Պրոցես է տեղի ունենում և այդ պրոցեսը շատ մեծ և գլոբալ պրոցես է։ Այս մասին Հ1-ին տված հարցազրույցում ասաց Ազգային ժողովի նախագահ Ալեն Սիմոնյանը՝ խոսելով Գեղարքունիքի ուղղությամբ Ադրբեջանական ագրեսիայի մասին։
«Եվ բնական է, այդ պրոցեսի ընթացքում հակառակորդ կողմը փորձում է ճնշումներ գործադրել մեր նկատմամբ»,- ասաց նա։
«Սա հերթական պարտադրանքների փորձն է։ Եվ հիմնական խնդիրը Լաչինի միջանցքի և Լեռնային Ղարաբաղի շուրջ ստեղծված իրավիճակներն են։ Փաստացի մենք միջազգային առումով մեծ ճնշում ենք օգտագործում։ Եվ մեծ ճնշում կա Ադրբեջանի վրա։ Եվ դրա մասին Ադրբեջանը նույնպես խոսում է։ Եվ նման ձևերով փորձ է արվում մեզ հետ պահել տարբեր քայլերից»,- ընդգծեց Սիմոնյանը։
Ըստ նրա՝ ադրբեջանական ագրեսիան կարող է կապ ուենենալ գալիք հանդիպումների հետ։
«Երկու օրից տեղի է ունենալու Պուտին-Էրդողան հանդիպում, որի ընթացքում միանշանակ քննարկվելու են, կարծում եմ՝ նաև բավականին, մեծ քանակությամբ որոշումներ կկայացվեն այդ երկու երկրների միջև մեր տարածաշրջանում համաձայնության գալու առումով։ Ու, ցավոք սրտի, մենք հիմա հայտնվել ենք այդ երկու գերտերությունների բանավեճի սեղանին»,- ասաց Ալեն Սիմոնյանը։
ԱԺ նախագահը նաև անդրադարձավ Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովայի հայտարարություններին, որոնց համաձայն՝ Հայաստանի իշխանությունների վարած քաղաքականության հետևանքն են Լաչինի միջանցքի փակումը, Լեռնային Ղարաբաղում ստեղծված իրավիճակը։
«Դա աբսուրդ է։ Եվ փորձ է սեփական անգործությունը, ինչ-որ տեղ նաև գործողություն իրականացնելու անկարողությունը բարդել հայկական կողմի վրա։ Ես տեսա այդ հայտարարությունը։ Եվ այնտեղ, որքանով հիշում եմ, ասում է, որ հայկական կողմը ճանաչել է Ադրբեջանի տարածքային ամբողջականությունը։ Բայց դա սուտ է։ Որովհետև Ադրբեջանի տարածքային ամբողջականությունը ճանաչել է հենց այն կողմը, որը պետք է երաշխավոր հանդիսանա, այն է՝ ռուսական կողմը»,- ասաց Սիմոնյանը։