G20-ի պառակտումն Ուկրաինայի շուրջ մարտահրավեր է Բրազիլիայի համար․ CNN Brasil
Բրազիլիան հասկանում է բարդությունն ու լրացուցիչ պատասխանատվությունը, որ ուկրաինական հակամարտությունը կդնի Բրազիլիայի՝ G20-ի նախագահության ուսերին։ Գրել է CNN Brasil-ը՝ հղում անելով իր աղբյուրներին։
Ըստ լրատվամիջոցի՝ ուկրաինական հակամարտության պատճառով G20 երկրների պառակտումը «լուրջ դիվանագիտական մարտահրավեր» կստեղծի Բրազիլիայի համար։
«Իտամարատին (Բրազիլիայի արտաքին գործերի նախարարության կենտրոնակայանը - Tert.am) քաջ գիտակցում է այն բարդությունն ու լրացուցիչ պատասխանատվությունը, որը միության պառակտումն ու Եվրոպայում հակամարտությունը կդնեն Բրազիլիայի նախագահության վրա»,- նշել է հեռուստաալիքի կայքը՝ վկայակոչելով Բրազիլիայի անանուն դեսպանին:
Ըստ աղբյուրի՝ ցանկացած նախագահող երկրի համար դժվարություններն անխուսափելի կլինեն, քանի որ G20-ը քիչ բան կարող է անել հակամարտությունը լուծելու համար։
«Բրազիլիան կարող է հնարավորություն ունենալ ընդլայնելու իր միջազգային տարածքը, եթե կարողանա օգտագործել գագաթնաժողովը անդամ երկրների միջև տարաձայնությունները նվազեցնելու համար»,- ասել է մեկ այլ աղբյուր։
Տեղեկությունների համաձայն՝ Բրազիլիան արդեն 3 հարց է ընտրել որպես G20-ի բրազիլական նախագահության առաջնահերթություն՝ պայքար գլոբալ անհավասարության դեմ, պայքար կլիմայի փոփոխության դեմ ու գլոբալ կառավարման համակարգերում խորը բարեփոխումների խթանում։ Այդ օրակարգերը պետք է տեղ բացեն բանավեճերի համար ուկրաինական հակամարտության մեջ ուղղակի կամ անուղղակի ներգրավված երկրների միջև։
Բրազիլիան G20-ի նախագահությունը ստանձնելու է սեպտեմբերի 9-10-ը Հնդկաստանի մայրաքաղաքում կայանալիք եզրափակիչ գագաթնաժողովից հետո։
Հնդկաստանն իր նախագահության ընթացքում ավելի քան 200 հանդիպում կանցկացնի խմբի շրջանակներում։