Լինում են դեպքեր, երբ ուշացման պատճառով չենք հասցնում ծանր վիրավորում ունեցողի կյանքը փրկել. ԼՂ առողջապահության նախարար
ԼՂ առողջապահության նախարար Վարդան Թադևոսյանը ներկայացրել է, թե ինչ իրավիճակ է այնտեղ, տեղեկություններ հայտնել վիրավորներին ՀՀ տեղափոխելու ուղղությամբ տարվող աշխատանքների մասին: Նախարարը շեշտել է` իրավիճակը փոխվում է ամեն րոպե, թվերն էլ են փոխվում:
«Ունենք մի քանի տասնյակ զոհեր, նրանց մեջ կան նաև քաղաքացիական անձինք, կա մանուկ, ում եղբայրն էլ ծանր վիճակում է, այլ երեխա, հիմա փորձում ենք այդ երեխայի, նրա մոր և մահացած երեխայի աճյունը ՀՀ տեղափոխել, աշխատանքներ ենք տանում այդ տեղափոխումը կազմակերպելու համար: Ես տեղեկացվեցի, որ վերջապես Մարտունուց մեր վիրավորներին բերեցին «Հանրապետական հիվանդանոց», բուժումները կշարունակեն, խնդիրներ ունենք Մարտակերտից մեր զոհվածների աճյունները և ծանր վիրավորում ստացածներին տեղափոխելու հետ: Ռուս խաղաղապահները փոխեցին պլանները, և չունենք ուղեկցող:
Կարծում եմ` վաղը վերջապես կկարողանանք նորից Կարմիր խաչի օգնությամբ անել: Աշխատանքներ ենք տանում, շատ ենք ուզում, որ 30-ից ավելի ծանր վիրավորում ունեցող մեր հայրենակիցներին գոնե այսօր տեղափոխել ՀՀ` բուժումը այնտեղ տարբեր հիվանդանոցներում կազմակերպելու: Աշխատում ենք ՀՀ ԱՆ ներկայացուցիչների հետ: Ուրախ եմ, որ ԿԽՄԿ-ն տվեց համաձայնությունը, որ ուղեկցեն, մեքենաները Հայաստանից գան Ստեփանակերտ, վերցնեն մեր վիրավորներին ու տեղափոխեն ՀՀ, լինում են դեպքեր, երբ ուշացման պատճառով չենք հասցնում ծանր վիրավորում ունեցողի կյանքը փրկել»,- ասել է նա:
The post Լինում են դեպքեր, երբ ուշացման պատճառով չենք հասցնում ծանր վիրավորում ունեցողի կյանքը փրկել. ԼՂ առողջապահության նախարար appeared first on ԳԱԼԱ.