Լավրովն ու Բայրամովը քննարկել են ԼՂ-ում ստեղծված իրավիճակն ու ԼՂ հայերի անվտանգության հարցը
Ռուսաստանի արտգործնախարար Սերգեյ Լավրովը սեպտեմբերի 27-ին հեռախոսազրույց է ունեցել իր ադրբեջանցի պաշտոնակցի՝ Ջեյհուն Բայրամովի հետ, որի ընթացքում քննարկել է Լեռնային Ղարաբաղի շուրջ ստեղծված իրավիճակն ու ԼՂ-ի հայերի անվտանգության հարցը։
Այս մասին հայտնել է ՌԴ արտաքին գործերի նախարարությունը։
«Քննարկվել է Լեռնային Ղարաբաղում տիրող իրավիճակը, այդ թվում՝ հայ բնակչությանը մարդասիրական օգնություն ցուցաբերելու, նրանց իրավունքներն ու անվտանգությունն ապահովելու հարցերը։ Դիտարկվել են 2020-2022 թվականներին ամենաբարձր մակարդակով եռակողմ համաձայնագրերի փաթեթի կյանքի կոչման ուղիները՝ Բաքվի և Երևանի միջև խաղաղության պայմանագրի մշակման, հայ-ադրբեջանական սահմանի սահմանազատման և տրանսպորտային հաղորդակցությունների ապաշրջափակման վերաբերյալ», - ասված է ՌԴ ԱԳՆ-ի հաղորդագրության մեջ։
Հաղորդվում է, որ կողմերը շոշափել են նաև երկկողմ ու տարածաշրջանային օրակարգի մի շարք թեմաներ, պայմանավորվածություն են ձեռք բերել տարբեր մակարդակներով հետագա շփումների վերաբերյալ։