Իսրայելի ՊՆ ղեկավարը հայտարարել է, որ հրադադարից հետո մարտերն ավելի ինտենսիվ ու մասշտաբային են լինելու
Հրադադարի ավարտից հետո Գազայի հատվածում ռազմական գործողությունները լինելու են ավելի ինտենսիվ և տարածվելու են անկլավի ամբողջ տարածքում։ Ինչպես գրում է Haaretz պարբերականը, այս մասին հայտարարել է Իսրայելի պաշտպանության նախարար Յոավ Գալանտը։
«Դրանք (մարտերը - խմբ.) ավելի մասշտաբային կլինեն և կընդգրկեն ամբողջ Գազայի հատվածը»,- ասել է Գալանտը:
Իսրայելի պաշտպանության նախարարի խոսքով՝ պաղեստինյան ՀԱՄԱՍ շարժումն օգտագործելու է զինադադարը վերախմբավորվելու և հանգստանալու համար, հետևաբար, զինադադարի ավարտից հետո Իսրայելի Պաշտպանության բանակը (ՑԱԽԱԼ) նախ հարվածներ է հասցնելու օդուժի ու հրետանու միջոցով, և միայն դրանից հետո է վերսկսելու հետևակի առաջխաղացումը։
Հիշեցնենք, որ Իսրայելն ու ՀԱՄԱՍ-ը համաձայնության էին եկել Գազայի հատվածում քառօրյա հրադադարի հաստատման շուրջ, իսկ ավելի վաղ հայտնի է դարձել, որ կողմերը պայմանավորվածություն են ձեռք բերել հրադադարը ևս երկու օրով երկարաձգելու վերաբերյալ։