Երուսաղեմում տեղի ունեցած հարձակումը «տեխնիկապես» չի խախտել Իսրայելի ու ՀԱՄԱՍ-ի համաձայնագիրը․ Սպիտակ Տուն
Երուսաղեմում տեղի ունեցած հարձակումը «տեխնիկապես» չի խախտել Իսրայելի և պաղեստինյան ՀԱՄԱՍ շարժման միջև կնքված հրադադարի համաձայնագիրը։
Այս մասին, ինչպես գրում է ՌԻԱ Նովոստին, հայտարարել է Սպիտակ տան Ազգային անվտանգության խորհրդի խոսնակ Ջոն Քիրբին։
Ինչպես մանրամասնել է Քիրբին լրագրողների հետ զրույցում, միջադեպը տեղի է ունեցել Երուսաղեմում, մինչդեռ համաձայնագիրը վերաբերում է միայն Գազայի հատվածին և չի տարածվում Երուսաղեմի վրա։
«Տեխնիկապես դա չի խախտել գործարքը, բայց սա վառ հիշեցում է այն բանի, թե ինչ թշնամու են նրանք (Իսրայելը - խմբ.) դեմակայում», - հավելել է Քիրբին:
Հիշեցնենք, որ այսօր առավոտյան ահաբեկչություն է տեղի ունեցել Երուսաղեմում։ Իսրայելական Kan ռադիոկայանի հաղորդմամբ՝ Արևելյան Երուսաղեմից երկու պաղեստինցի Թել Ավիվի կողմից քաղաքի մուտքի մոտ ահաբեկչություն են իրականացրել հրազենի գործադրմամբ։ Արմատականներն ավտոմեքենայով մոտեցել են ավտոբուսի կանգառին, դուրս եկել մեքենայից ու ատրճանակից և М16 հրացանից կրակ բացել այնտեղ կանգնած մարդկանց ուղղությամբ։ Իսրայելցի զինվորականները պատասխան կրակով վերացրել են ահաբեկիչներին։
Իսրայելի ԱԳՆ մամուլի ծառայությունը հայտնել է առնվազն երեք զոհի և վեց տուժածի մասին, մինչդեռ ՀԱՄԱՍ-ի ռազմական թևը՝ Իզեդդին ալ-Քասամ բրիգադները, որոնք ավելի ուշ ստանձնել են ահաբեկչության պատասխանատվությունը, պնդում են, որ վիրավորում է ստացել 12 իսրայելցի։