მიხეილ სააკაშვილი: მოვითხოვოთ რიგგარეშე საპარლამენტო არჩევნები
„ხალხო, თქვენ დღეს ამ ბინძურმა ოლიგარქმა თავზე გადაგახიათ კანონი, კონსტიტუცია, დემოკრატია, არჩევნების ინსტიტუტი“, - მიმართა ხალხს საქართველოს მესამე პრეზიდენტმა, მიხეილ სააკაშვილმა „რუსთავი 2“-ის ეთერიდან. მისი თქმით, არჩევნების მეორე ტურს, რომელიც ძალადობისა და მასობრივი დარღვევების ფონზე ჩატარდა, საერთო არაფერი აქვს დემოკრატიასთან და აუცილებელია რიგგარეშე საპარლამენტო არჩევნების მოთხოვნა.
„ღია საპროტესტო აქციებით, მშვიდობიანით, დავიწყოთ მოთხოვნა რიგგარეშე საპარლამენტო არჩევნების და ამ ე.წ. არჩევნების არალეგიტიმურად გამოცხადება. ჩვენ საქართველოში გვჭირდება ახალი ხელისუფლება, ჩვენ გვჭირდება საქართველოში, რომ ხალხმა აიღოს ხელში ხელისუფლება. წინააღმდეგ შემთხვევაში საქართველოს გადარჩენა არ უწერია“, - განაცხადა მიხეილ სააკაშვილმა. მან ამომრჩევლებს მაქსიმალური აქტიურობისა და თითოეული ხმის დაცვისკენ მოუწოდა.
მიხეილ სააკაშვილის თქმით, ის არ იბრძვის ხელისუფლებისთვის, მაგრამ როგორც „რიგითი რიგითთა შორის“ და „თანასწორი თანასწორთა შორის“, ის საქართველოს მომავლისთვის ყოველთვის იბრძოლებს. ექსპრეზიდენტი თვლის, რომ ახლა ის დროა, როცა ხალხმა თავისი გადამწყვეტი სიტყვა უნდა თქვას.
„დღეიდან ბიძინა ივანიშვილი აღარ არის საქართველოს ლეგიტიმური მმართველი. მე არ ვაღიარებ და ქართულ საზოგადოებას მოვუწოდებ, არ ვაღიაროთ ამ არჩევნების შედეგები. ეს არაფერ კავშირში არ არის დემოკრატიულ პროცესთან... როდესაც კრიმინალი მთლიანად შეერწყა ხელისუფლებას, როდესაც მთავარი მძარცველი მოაჯდა თავზე ყველა სახელმწიფო ინსტიტუტს, აკონტროლებს უკლებლივ ყველა პროცესს, დგება მომენტი, როცა საზოგადოებამ საკუთარ ხელში უნდა აიღოს კანონის დაცვა, კონსტიტუციის დაცვა და თავისი თავისუფლების დაცვა“, - განაცხადა მიხეილ სააკაშვილმა.