ქართველი მეზღვაური ლიბიაში გარდაცვლილი იპოვეს - საზღვაო ტრანსპორტის სააგენტო
ლიბიაში დაკარგული მეზღვაური გარდაცვლილი იპოვეს ზღვაში, აცხადებენ საზღვაო ტრანსპორტის სააგენტოში. უწყების ცნობით, ცხედარი საზღვაო ნავსადგურის ტერიტორიაზე იპოვეს და პირველადი დათვალიერებით მას დაკარგული მეზღვაურის დავით რაზმაძის ნიშნები აღენიშნება. ამ დროისთვის ექსპერტიზა მიმდინარეობს დასაზუსტებლად და გარდაცვალების მიზეზის დასადგენად.
ლიბიაში გაუჩინარებული მეზღვაურის, 23 წლის დავით რაზმაძის ოჯახის წევრების ინფორმაციით, მას ბოლოს ესაუბრნენ 6 იანვარს და დათამ აცნობათ, რომ ლიბიაში იმყოფება თურქული კომპანიის გემზე. დავით რაზმაძის ბიცოლამ ნინო ლაბაძემ, რომელიც ბათუმში ცხოვრობს, რადიო თავისუფლებას უთხრა, რომ დავით რაზმაძე 7 იანვარს დაიკარგა, მაგრამ თურქულმა კომპანიამ ოჯახს წერილობით შეატყობინა მხოლოდ 14 იანვარს გაუგზავნა. „ლიბიის პოლიციასთან ერთად ვეძებთო. შემატყობინეს, რომ 7 იანვარს 12 საათზე ჩავიდა ვახტზეო, ხოლო 16 საათზე როცა მისი შემცვლელი მივიდა დათა იქ აღარ იყოო. ეს არის ჩვენთვის ცნობილი და კიდევ ის, რომ მისი ტელეფონი, სიგარეტი და პირადი ნივთები გემზეა. გემიდან მისი ჩასვლა არ ფიქსირდება, თუმცა ჩვენ ვვარაუდობთ, რომ ჩავიდა და ლიბიის პოლიციას ჰყავს აყვანილი“, - ამბობს ნინო ლაბაძე. დავით რაზმაძე მარშალის კუნძულების დროშით მცურავი თურქული გემის, „Mv Dogan Bey“-ს ეკიპაჟის წევრია.
ნინო ლაბაძემ რადიო თავისუფლებას უამბო, რომ დავით რაზმაძე გორის საჯარო სკოლის მეცხრე კლასში სწავლობდა, როცა ბათუმში გადაიყვანეს, საზღვაო აკადემიაში სასწავლო კურსი გაიარა და მას შემდეგ შორეულ ნაოსნობაში არაერთხელ ყოფილა სხვადასხვა კომპანიის გემებით. საქართველოს საგარეო საქმეთა სამინისტროს ინფორმაციით, დავით რაზმაძის გაუჩინარების გამო ვითარების გასარკვევად მუშაობენ საქართველოს საელჩო ეგვიპტეში, რომელიც ლიბიასაც ფარავს და გენერალური საკონსულო სტამბოლში. სამინისტროს ცნობითვე, ლიბიაში დეტალებს არკვევს გემის მფლობელი თურქული კომპანიის ადვოკატიც.
2008 წლის აგვისტოს ომის დროს არაერთი ქართული და უცხოური მედიასაშუალებით ვრცელდებოდა ფოტო, რომელზეც დავით რაზმაძის მამა, ზაზა რაზმაძე დასტირის გორის დაბომბვისას დაღუპულ ძმას. თავად ზაზა რაზმაძე 2014 წელს გარდაიცვალა.