საქართველოს რუკას სისხლის სამართლის კოდექსი დაიცავს
საქართველოს პარლამენტის იურიდიულ საკითხთა კომიტეტი 18 თებერვალს განიხილავს საქართველოს კანონის პროექტს „საქართველოს სისხლის სამართლის კოდექსში ცვლილების შეტანის შესახებ“.
ცვლილების მიღების შემთხვევაში, სს კოდექსს დაემატება 343-ე პრიმა მუხლი, რომლის მიხედვითაც საქართველოს ტერიტორიული მთლიანობის დარღვევით შედგენილი რუკის ნაბეჭდი გამოცემის ან ასეთი გამოსახულების შემცველი სხვა საგნის დამზადება, წარმოება, გავრცელება, რეკლამირება, რეალიზაცია, საქართველოში შემოტანა ან საქართველოდან გატანა დაისჯება ჯარიმით ან თავისუფლების აღკვეთით ვადით ორ წლამდე.
„საქართველოს კონსტიტუციის შესაბამისად, საქართველოს ტერიტორიული მთლიანობა და სახელმწიფო საზღვრის ხელშეუხებლობა დადასტურებულია საქართველოს კონსტიტუციითა და კანონებით, აღიარებულია სახელმწიფოთა მსოფლიო თანამეგობრობისა და საერთაშორისო ორგანიზაციების მიერ. ბოლო პერიოდის განმავლობაში ადგილი ჰქონდა შემთხვევებს, როდესაც ხორციელდებოდა საქართველოს ტერიტორიული მთლიანობის დარღვევით შედგენილი რუკების გავრცელება. მიზანშეწონილია, საქართველოს სისხლის სამართლის კოდექსით ზემოაღნიშნული ქმედება განიხილებოდეს დასჯად ქმედებად და დაწესდეს სათანადო სასჯელი”, - წერია კანონის პროექტის განმარტებით ბარათში, რომელიც საქართველოს პარლამენტის ოფიციალურ საიტზე გამოქვეყნდა.