კახა კალაძე: თუ არაფერი შევცვალეთ, ჰაერი აღარ დარჩება ქალაქში
თბილისის მერის კახა კალაძის განცხადებით, დედაქალაქში კრიტიკულ ზღვარს აღწევს სატრანსპორტო საშუალებებით ჰაერის დაბინძურება.
დედაქალაქის მთავრობის სხდომაზე კალაძემ განსაკუთრებულად პრიორიტეტულ საკითხებს შორის დაასახელა ავტოტრანსპორტის გამონაბოლქვით ჰაერის დაბინძურება და საცობების მზარდი ტენდენცია. მერის ინფორმაციით, 6-7 პროცენტით იზრდება იმპორტირებული ავტომობილების რაოდენობაც.
კალაძის განცხადებით, პრობლემის ერთი ხელის მოსმით გადაჭრა შეუძლებელია, თუმცა, არსებული რესურსით და გრძელვადიან შედეგზე გათვლილი სატრანსპორტო პოლიტიკით პრობლემების მოგვარება შესაძლებელი იქნება.
კახა კალაძის განმარტებით, ეს პოლიტიკა მიზნად ისახავს ქალაქში ნაკლებ ავტომამანქანას და მეტ საზოგადოებრივ ტრანსპორტს. მერის ინფორმაციით, თბილისის მთავრობის სურვილია 2019 წლის ბოლოსთვის მთლიანად შეცვალოს „ყვითელი ავტობუსების“ პარკი და დამატებით შეიძინოს ახალი, თანამედროვე, კომფორტული და სწრაფი ავტობუსები
"თუ არაფერი შევცვალეთ, ჰაერი აღარ დარჩება ქალაქში" - განაცხადა თბილისის მერმა.